National Deworming Day pualin nimin khan Chief Medical Officer, Aizawl East District hmalaknain Chanmari West Anganwadi 3, Chanmari West ah rulhut leh a kaihhnawih natna chungchang zirtirna hun hman a ni.
NDD puala hun buatsaih hi Sr. CMO, Aizawl East District Dr. Lalparliani’n kaihruaiin, DPO, WCD, Aizawl District Dr. Lalhruaitluangi Chhangte-in he hun hi a hmanpui.
Anganwadi naupang leh an chhungte engemawzat an tel a. National Deworming Day chu Rulhut umbo nan a sawrkar laipui hmalakna niin, kumtin tum hnih hman thin a ni a, zirna in tin leh Anganwadi Centre-ah naupang kum 1 atanga kum 19 inkarte rulhut hlo pek thin an ni.
Nimin vek khan Garden Primary School, Rahsi Veng, Lunglei-ah chuan National Deworming Day hman a ni a. Addl. DC, Lunglei J. Mialung chuan hmanpuiin, school naupang te hnenah rulhut hlo Albendazole a eitir.
Lunglei Addl. DC chuan National De-Worming Day chu India rampumah hman thin a nih thu leh a tum ber chu naupang kum 1 atanga kum 19 inkarte rulhut laka ven a nih thu a sawi a. Ram hmasawn zelah hriselna kawnga hmalaknate ngaihpawimawh a nih thu sawiin, Lunglei District ah naupang thang tha lo 26.5% awmin, cher 9% an awm a, Nutrition ah hmasawn se rulhut pai avangin hetiang hi a awm theih tho thu a sawi.
Rulhut pai lo turin tih theih awlsam tak kut silfai that, thlai leh thei eitur silfai that, tui thianghlim chauh in, ekin tha leh thianghlim taka inthiar, eitur khuh that bakah in leh a vel vawnfai te, tha taka zawm a tul thu a sawi a. Rulhut laka fihlim District ni turin rulhut hlo ei theuh turin a chah a ni.
Natioanal Deworming Day ah hian naupang kum 1-19 te hnenah rulhut hlo Albendazole pek thin a ni a, Lunglei District a Govt. School, Govt. Aided School, Anganwadi Centre, kum 1-5, Anganwadi Centre-a hming ziaklo, naupang kum 6-19 inkar School kallo leh College zirlai te hnenah rulhut hlo pek vek tum a ni a, hemi ni a la hman lo te tan chu 16.2,1024 ah Mob Up Day ah pek leh tur a ni.
Kolasib-ah pawh nimin vek khan National Deworming Day First Round chu Senior Chief Medical Officer Dr RK Lalthlamuana’n Kolasib District Hospital OPD-ah a hawng a. Rulhut hlo ei pawimawhna sawiin, nu leh pa te chu an fa te rulhut hlo pek ngaipawimawh turin a chah.
Champhai-ah pawh National Deworming Day chu Govt. Vengthlang Middle School-ah Additional DC M. Misael-a’n a hawng a. Rulhut hlo ei beihpui thlakna National Deworming Day chu hriselna kawng inzirtir thar lehna atana hun pawimawh tak a nih thu a sawi.