Aizawl : Kum kalta 2023 chhung khan Serchhip District-ah phallohna hmuna mei zu mi 72 man an ni a. CMO Conference Hall, Serchhipa kohhran hrang hrang hruaitute tana workshop buatsaihah vawiin khan he thu hi sawilan a ni.
January, 2023 atanga December, 2023 thleng khan Serchhip District Anti-Tobacco Squad-in Squad Drive vawi 35 an nei a. Dan-in meizuk a khapna hmuna meizu an awm leh awm loh leh meizuk khapna dan siam hrang hrang bawhchhia an awm leh awm loh an enfiah thin. Dan zawm lova puipunna hmuna meizu mi 72 manin, heng mi te pawisa chawi tlingkhawm chu Rs. 3,490 a ni.
Nikum chhung khan Serchhip-a Tobacco Cessation Clinic (TCC) chu mipa 134 leh hmeichhia 88, an vaiin mi 222 in an pan a, an zinga mi 36 (mipa 17 leh hmeichhia 19) chuan vaihlo leh a kaihhnawih an tih thin te an sim a, hei hi TCC pantu atanga chhutin zaa 19.45 a ni.
Training-ah hian State Nodal Officer, NTCP & Addl. Director (D) Directorate of Hospital Medical Education (DHME) ni bawk Dr H Lianthangpuia’n zuk leh hmuam do chu kohhran hruaitute atanga bultan ni se tha an tih thu a sawi a. Vaihhlo leh a kaihhnawih la ti lo te ven leh ti mek te simtir chu an tum ber a nih thu leh kohhran hruaitute pawhin hei hi tlangaupui tam se an duh thu a sawi bawk.