Kum 2027-ah Uefa president an thlang thar leh dawn a, tah chuan tuna tang lai Aleksander Ceferin chuan chuh a tum tawh loh thu a sawichiang.
Tunhnai Paris khawpuia Uefa inkhawmpui (congress) chuan hruaitu thlan dan kalphung tidanglamin, he vote thlak dan lo danglam ta behchhan hian kum 56 mi Ceferin chuan inthlan leh hunah pawh a chuh thei a, a tling a nih chuan kum 2031 thleng European football thuneitu sangber hi a la kilkawi thei ang.
Dan hlui chang taah kha chuan president tan term thum chelh theih a ni a, mahse, dan thar an pass takah hi chuan Ceferin hian term li a chelh thei tawh dawn a, kum 2016-a Michel Platini a thlak term hmasa kha kum li awh term puitlinga chhiarsak a ni lo a, chuvangin kum 2027 inthlanah a duh chuan a chuh leh thei dawn a, mahse, nomination a file tawh loh tur thu a nemnghet ta a ni.
He vote thlak dan thar dodaltu awmchhun English Football Association (FA) chuan hruaitute chu term thum bak an post chelh lo tura an duh thu an sawi.
Fifa kalphung bawhchhiaa puh Platini inhnuhdawh hnu May 2016 khan Ceferin hian president hna a chelh tan a; Paris khuaa Uefa inkhawmpui lianah an dan thar putluh chuan two-thirds majority hmuin, ram 49 zetin motion thlawp zawngin vote an pe a, mahse, kum 2027-a la ding leh thei president tanglai chuan dan thar an pass hma thlaruk kaltaah khan ding nawn tawh lo turin thutlukna a lo siam tawh tih news conference-ah a sawi.
Slovenian pachal hian a tar at hma zawng lal a tum ve chiah lo niin a lang a, inthlana chuh tawh loh a tum chhan sawiin, “Organisation tin hian mithar an mamawh ve thin a, chutih rualin kum sarih chhung teh meuh chhungkua ka awp mumal thei ta lo a, hmel thar hmuh ve tawh ka duh pah bawk a ni,” a ti phal mai.