Zirtawp zing khan boxing-ah light-welterweigh champion Teofimo Lopez chuan unanimous decision in Jamaine Ortiz a hneh a, a kawnghren a humhim.
Lopez leh Ortiz te hi an inhnehtawk viau a, round 12 chhungin chak tur zawk rin thiam har khawpin an inhnehthawk. Inhnek a tawp hnuin inhnialna a chhuak zui na hle. Endiktu pahnihin Lopez hi point 115-113 ve ve in an chaktir a. He thutlukna hi a hmuna awmte pawhin an pawmpui viau niin a lang. Endiktu pakhat erawh chuan Lopez hi point 117-111 zetin a chaktir ve thung. Hei thutlukna hian mak tih a hlawh a, Michelob Ultra Arena a entuten an au el hial.
Lopez laka kawnghren hlawhchhuak zo ta lo Ortiz chuan, “ruahman lawk angin ka khelchhuak thei a, ka team leh kan corner a mite ka bengkhawn reng a, chak zawk niin ka inhria” a ti hmasa te te a. Insumkar zui duh lovin, “Eng chu nge ka sawi leh chuang ang le… ka bum tluanchhuak parh a, min hnek fuh eih lo. Chak zawk ni ngeiah ka inngai. Point 117-111 hi nuih tiza bang lo mai a ni”, tiin Judge pakhat a perh na hle. Lopez lakah a tlawm leh tak vangin Ortiz hian inhnek vawi 20 a hmachhawn tawhah tlawm zawkah vawi hnih a tang ve ta a ni.
Harsa taka Ortiz hnehtu Lopez chuan, “In duh apiang in boo thei a lawm le,” tiin tawngka leh chetzia in entu mipui a chhaih hmasa zet a. American unified welterweight champion Terence Crawford a cho zui nghal. “He ta hi ka awm a, ka inpeih thlap e! Inhnek ka chak et et. Ka naupang zawk a, ka hmeltha zawk bawk”, a ti. Lopez hian lightweight champion Vasiliy Lomachenko a hneh nawlh a, boxing-ah a hming a chher lian. Lomachenko a hneh hnuin George Kambosos Jr a hneh lo ringawt thung a. Inhnek vawi 20 a hmachhawn tawha a hneh loh awmchhun chu George Kambosos Jr hi a ni.