- Kima Mivam
Mizo khawtlang nunah hian nawhchizawrh hi kan sawi mawi ngai lo mai ni lovin sawrkar pawhin a khap chhan ni thei chu, kan sakhaw bu pawimawh em em, kan rin bur mai, Bible thu vang a ni ngei ang. Bible hian nawhchizawrh chu a phal reng em ni?
THUTHLUNG HLUI LAMA NAWHCHIZUAR
Bible hun lai hian nawhchizawrh dan changkang leh him a awm a ni nge? Nawhchizuar dawr thin Roreltu ropui Samsona te meuh pawh an ropuina laksakin an awm lem lo. Roreltute 16:1 ah chuan “Samsona chu Gaza khuaah a kal a, chutah chuan nawhchizuar hi a va hmu a, a pâwl ta a” tiin a inziak a, hemi hnu hian Gaza khawpui kulh kawngkhârte leh a ban pahnih chu a la phawi thei a, a chakna lak sak a ni lem lo tih a chiang thei awm e. A chakna Pathianin a lak sak chu, he thil thlen hnu fe ah, Delili mal chungah khan a ni.
Tin, Jakoba fapa Juda khan a monu Tamari chu nawhchizuar emaw tiin a pawl a, dem hlawh a hnekin, Isua thlahtute zingah chhiar tel a nih phah a. Juda khan Nawhchizuar anga lang Tamari kha pawl lo se chuan, Tamari kha Isua thlahtute zinga mi a ni thei lovang. Juda pawh kha he a thiltih avang hian harsatna a tawh thu hriat a ni lo. Tin, an fapa Pereza thlah zel ah chuan Isua a lo piang a ni. Juda khan nawhchizuar emaw tia a pawl bak kha Tamari hi a pawl lo a, (Gen 38:26) chuti a nih chuan Isua kha Nupa kar ni lova piang, Pereza, chumi atanga piangchhuak a ni thei ang em? Hei chu chhiartu ngaihtuah zui a tan nise.
Tin, Israel fate Kanaan ram an luh dawn khan enthlatute kha, Kanaan mi Nawhchizuar Rahabi inah an lut a, an pawl lovang tih sawi a har viau bawk, tin, chu nawhchizuarnu chu, mahni hnam phatsana dawt a sawi avangin Isua thlahtu tangkai tak a la nih phah zui a ni. Mak deuh mai chu, Isua thlahtute ah hian nawhchizuar an lang nawlh hlawm a; tin, Moab Nuthlawi Ruthi te pawh an tel kha maw! Rahabi hi, Nawhchizuar a nih bakah dawta mahni hnam phatsantu a ni chungin malsawmin a awm zawk a ni. Josua 2:1 ah chuan, “Rahabi inah an va lut a, chutah chuan an thleng ta a” tih thu kan hmu a, heta “thleng” tih hi Hebrai tawng chuan ‘Shakab’ a ni a, a sap tawng chuan “to laid down” tih ni thei mahse, hmun tam zawkah chuan “To lie (of sexual relations), to be lain with (Sexually)” tiin a sawi a. Chuti a nih chuan Josua mi tirh, enthlatute khan Rahabi nawhchizuar kha an mutpui ngei tih a hriat theih ang. Chutianga nawhchizuar dawr turte chu a hnam ang leh mi mal ang pawhin malsawm an ni tho.
Tuna kan sawi lan tak ang hian Bible lama kan mi chhuan thenkhat chuan nawhchizuar an dawr a, hrem an ni lova, tin, nawhchizuar lai leh zuar anga awmte pawh hrem a hnekin Isua thlahtuteah chhiar tel an ni zui a, malsawmna chi khat a ni ang. Bible hian hmeichhe hming a lam tha duh lo viau chungin an hming a lam tlat mai.
ISRAEL HUN LAIA NAWHCHIZUAR
Acnient Near East an tih mai thin Israel ram chhehvelah kha chuan Temple nawhchizuar (qadištu) kha chu an awm ngei mai a, thianglim taka kalpui a nih a rinawm a, tin, anni erawh kha chuan hna bik pawh an nei a, tleirawl thenkhat chu an nu leh pa ten temple nawhchizuar turin an pathian hnenah an hlan thin a ni. (Code of Hammurapi, 178–82). Mahse, Israel fate kha chuan milem biakna nena a inzawm avangin an dem hle thin a, an sum thawhchhuah pawh Temple thawhlawmah an duh lo (Deut. 23:18). Babulon tihdanah phei kha chuan an nulate khan hun eng emawti chhung chu nawhchizuar changkang (Sacred Prostitution) ni turin an inpe ngei ngei tur a ni a, pasal an neih hma ngeiin an thianghlimna (virginity) kha an Pathiannu Mylitta hnenah an hlan tur a ni (Ishtar; 1:199).
Tichuan, I Samuel 2:22 ziak a Elia faten “rawngbawltu hmeichhiate” an lo mutpui kha Nawhchizuar changkang (Temple prostitution/Sacred Prostitution) an nih ngei a rinawm bawk a. Hmun thianghlim an tih bawrhban avangin Elia fate thiltih kha chu Pathian pawhin a duh lo hle a nih kha. Kan Bible hian Nawhchizuar changkang hi a pawm kan ti thei mai ang em?
SEX TOY LEH MIZORAM
Sex toy pawh hi zoramah hian a lar ta hle mai a, Social media kaltlangin a rukin zawrhchhuah a ni char char tawh a. Chi hrang hrang pawh a rawn lut nasa a ni ang. A then chu mipa hman chi a nih rualin, hmeichhe hman chi pawh a tam tawh a ni, A bikin nula senior pasal hmu mai lo leh, nuthlawi leng leh ten an hmang nasa maithei. Taxi driver pakhat hian min hrilh a, Sex toy zuar pakhatin a deliver tur a thlauh palha, loh theihlohin a chharkhawm pui a, chuta an titinaah chuan chu nu, sex toy deliver-tu chuan, ‘Tuna ka deliver pa kha chu che chhuak thei tawh lo, nupui pawh hmu zo tawh lo tur a ni a, mihring a nih chuan chakna a nei ve tho si a’ tiin a sawi a, ngaihtuahna a ti thui khawp mai.
Sex toy zawrh kan sawi hian masturbation chu sual a nih thu kan sawi hluai thin, Mahse, Bible lama mi hrang leh huaisen te pawh khan nawhchizuar changkang an lo dawr ve fo tho mai. Chu chu Masturbation aiin Mizo kristiante ngaihdanah chuan a sual zawk mah ang.
SOCIAL MEDIA LEH NAWHCHIZAWRHNA
Tunhnaiah thil duhawm lo deuh social media lamah a rawn viral hluai mai a, awm hmunah rilru a lo na ve ngawih ngawih a, ngaihtuahna a kal thui hle mai. Zofate thil ngaihven zawng a ni nge, a lar hep hep hle a. Zan khat an sum hlawhchhuah pawh nuai 18 an ti hem mai mawle! Mahse, nu leh pa hriat loh thil ava tam em! Khate chu a ve lek chauh an ti a, a ni tak tak a. Social media lam nawhchizawrhna lo nasat tawh zia chu hriat hrehawm khawp a ni ang. Hmeichhiain mahni taksa an khal lai video an zuar chuai chuai tawh mai nia maw le! Social mediaah group an siam a, a then chuan riahpui theih an nih thu te an post a, an video-ah an taksa tlem lang leh itawm tawk leka siamin an account lamah an tarlang thin bawk. Tin, an account ah an live a, sexy tak takin an inpho lang thin bawk.
Zoram lamah hian khap mah ila, Media changkang tak hmang hian kan nula tlangval ten nawhchi an zuar mek a, Tuna video rawn viral pawh kha puitling chin en tura an siam a ni ang, private taka nawhchizuar a nih ber chu. Mahse, a entu ten an ti viral mai zawk a ni a, a ti viral-tu zawk kha naupangte hnena awlsam taka video petu zawk a nihna a awm a, mahse, mipui nawlpui chuan kan dem thu kan chhakchhuak tam lo hle. Tin, nawhchizawrhna tur bika siam ni awm tak applications te pawh a awm nawk si a, Kan inkhap reng thei ang em? Naupangte venhim tal hi ngaihtuahnaah kan sen nasat a tul tawh mange. Social media leh phone an khawih dan hi nu leh pa ten kan ngaihven a tul zia a tilang, Nupa karah pawh in hriat sak a tulna chen a awm ang.
KHARNA
A hmasa lama kan sawi tawh ang khan Bible hian nawhchizawrh a thlawp a tih theih ang em? Thuthlung hlui chauh a nih khi, tih zawhna a awm thei a, Sawmapakhat pawh hi Thuthlung thar lamah thawh tur thu a sawi a ni lem lo, kan uar ber chu a ni si. Bible hun lai khan Temple pawn lamah thianghlim takin Nawhchizawrhna hi an lo kalpui reng em ni le? Porn industry hi khawvelah pawh a lian em em a, mipui pawh a hip nasa a ni ang, tunlaiah phei chuan langsar si lo hian thil tam tak a tih theih tawh si a. Sawrkar hian legalise mai se tih chu sawi ngam chi pawh ala ni awm lo ve, Kohhran a hlauh dan em em han en chuan. Mahse, Kan ram eichhe mek tu leh Kan milar te ngei pawh case tenau mai maia buai ngai lova inhrikthlakna tur siam saka, hun leh hmun zalen siam sak hi a ngai tawh a ni mai lo maw? Mahse, hei hi erawh kan hriat tel a tha ang, nawhchizawrhna chu felfai taka kalpui chu a ngaiin a rinawm a, hri tha lo inkai thei lakah te fihlim theih dan kawng dap nasat a ngai viau ang. Tin, Social media leh internet kan hman dan hi hei aia changkang zawk leh hlawkthlak zawk a nih theih nan nu leh pa mai bakah khawtlang hruaitte leh sakhaw hruaitute hian tan lak a hun tak zet zet e.