- Ruata
Maruti Suzuki chuan Multi Purpose Vehicle lirthei an neih zinga mi Ertiga chu nuai 10 an hralh tling ta tih an puang.
Maruti Suzuki hian MPV huangchhungah hian Ertiga bakah Nexa atanga hralhchhuah XL6 an nei bawk a. Premium MPV huangah pawh Invicto neiin hei hi MPV changkang leh man to lehzual ho huang a ni a. An MPV zinga chhuak hmasa ber Ertiga hi multipurpose vehicle huang a ni bawk a kawng hrang hrang ramchhunga leituten an hmang tangkai em em a. Tunah hian nuai 10 lai an siamchhuak ta pawh hian mipuiten an mamawh zia leh an ngaihhlut zia a tilang chiang hle a ni.
Hetihrual hian an MPV dang XL6 leh Invicto te hi chu tunhnaia chhuak a ni a. A changkang a tha viau na a, sales lamah chuan a chhuak hmasa leh lo hlun zawk tawh Ertiga chu a la tluk thei lo a. Heng MPV changkang pahnih pawh hi hralh a kal chho viau dawn a, hmanna tur pawh kawng hrang hrangin a tam viau dawn a. Ertiga ang bawkin mimal hman atan te, khualzin phurh nan te leh mi pawimawh te phurh nan an hmang chho mek bawk a ni.
Maruti Suzuki Ertiga hi kum 2012 daih tawh khan hralhchhuah tan a ni a. Tunhnai thla riat chhung khan nuai 1 an hralhchhuak tih Maruti Suzuki chuan an tarlang a. Hei hian tunhnaiah pawh hralh a la kalin India ram mipuiten an la duh hle tih a tilang chiang awm e. Ertiga hian chuai lam aiin market lamah pawh hmasawnna kawng a la pan zel tih a hriat theih bawk a ni.
A chanchin ngaihnawm ve deuh chu Maruti Suzuki Ertiga hi an tlangzarh tirh kum 2012 khan MPV huangah si khan a man tlawm, khatihlai leh tun thleng pawha MPV man to leh lar Toyota Innova te hnuai chiah, MPV man to lutuk lo huang thara lirthei hmasa ber a ni a. Khatihlai khan Toyota Innova lei pha si lo leh MPV huang tho si, a man tlawm deuh duh te khan an bawh nghal em em mai a. Maruti Suzuki hian huang thar an rawn luhchilh nana an hman lirthei fuh tak a ni a tih theih awm e.
A tir lam khan Ertiga-ah hian 1.3-litre Fiat-sourced diesel engine duhthlan tur a awm tel a, hei hian he lirthei leitute pawh a hip hle a. A hnuah kum 2018 khan second-gen Ertiga tihchhuah leh niin hetah hian 1.3-litre diesel khawl bakah 1.5-litre diesel khawl thar hlak an rawn dah leh bawk a. Tunah chuan Ertiga diesel hi chu BS6 emissions norms a awm thar atang khan kan hmu tel ngai ta lo a ni.
Maruti Ertiga-ah 1.5-litre petrol khawl leh CNG hmang te in tunah hian duhthlan tur a awm mek a. Market lamah chuan Kia Carens leh Renault Triber te nen an inel mek a tih theih bawk a ni. Maruti Suzuki in an tarlan danin lirthei lei vawikhatna hoin Ertiga hi an bawh hle a. Tunah hian Rs Nuai 8.69 – 13.03 inkar man niin variant hrang hrang LXI(O), VXI(O), ZXI(O) leh ZXI+ te a awm a. 1.5-litre, K-series petrol engine, mild-hybrid system awm tel, transmission pawh 5-speed manual leh torque converter automatic gearbox duhthlan theih a hmang mek a ni.
Ertiga pawh hi tihtawp tur tih thu a la awm lo a, thil thar nen kan la hmu chho zel turah beisei ila. Maruti hian tunhnaiah hmalakna hrang hrang neiin hybrid leh EV khawl thar te pawh an duang chho mek a. Heng hi an lirthei lo chhuak zel tur eVX leh adangteah an hmang dawn a ni.