Pakistani-te chuan an ram inthlanpui neih atanga ni li hnuah pawh eng party-in nge sorkar siam dawn tih leh tu nge an prime minister thar tur tih an la hre thei lo.
Prime minister hlui, Imran Khan-a chu manin a kaihhruai, Pakistan Tehreek-e-Insaf (PTI) party chu nasa takin hrek ni mah se an party-in an thlawp independent candidate-te chu rinphak bakin an chak a, National Assembly-ah bial 93 zet lain party malah chuan chak tam ber an ni a. Hetih rual hian sorkar siam tur khaw chuan member 169 tal an neih tlin a ngai thung.
Prime minister hlui tho, Nawaz Sharif-a kaihhruai, Pakistan Muslim League Nawaz (PML-N) chu pahnihna niin bial 75 an la bawk a. Ani hi kum nga kal taa an ram chhuahsana tlanchhia ni mah se tun tumah hian an rama thiltithei tak, sipaiin an thlawp an nih avangin chak tura rin an ni.
Politics-a hnuhma ngah tak chhungkua, Bilawal Bhutto Zardari-a kaihhruai Pakistan People’s Party (PPP) chuan bial 54 neiin pathumna an ni ve bawk.
An ram danah chuan February 29-ah sorkar siam ngei tawh tur a ni a, hei hi vote thlak ni atanga chawlhkar thum chhung tihna a ni a. National Assembly-ah hian thutna 336 a awm a, heng zinga 266 hi mipuiin an thlan niin 70 chu hauh (reserve) a ni a. Hauh zinga 60 hi hmeichhe tan leh 10 chu Muslim ni lote tan a ni a. Seat hauh sa hi party-te hnenah inthlana bial an lak tam dan azirin sem leh thin a ni.
Sorkar a ding dawn a nih chuan tangrual sorkar a din ngei a ngai dawn tihna a ni a. PTI leh PML-N hian hnehna changtuah an inchhal ve ve a. Inpawhna nasa tak a la thleng mek zel a, independent candidate zinga chak lo thenkhat chuan vote tihchingpen a awm nia sawiin court-ah an zualko mek hlawm a. PTI thlawptute pawh Election Commission pisa tualah an pungkhawm bawk.