Aizawl : BJP Mizoram President Vanlalhmuaka chuan sorkar laipuiah Mizoram aiawha MP te thusawiin awmzia a neih theihna’n Lok Sabha inthlanpui lo awm tur chu hmang tangkai turin Mizo mipuite a chah.
BJP chuan nimin khan an party pisa, Mipui Run-ah chawlhkar thar inhlanna leh political session hun an hmang a. He hunah hian Vanlalhmuaka chuan, Lok Sabha inthlanpui lo awm turah BJP chuan hneh takin sorkarna a siam leh dawn tih a sawi a. Mizoramin Lok Sabha leh Rajya Sabha inthlanah state-a rorel lai party atanga theh chhuah tawh thinte hian sorkar laipuiah an thusawiin awmzia a nei mawlh hle niin a sawi.
Vanlalhmuaka chuan Mizoram state retheihna ata khaichhuaha a awm theihnan leh Mizo mipuite’n tlangnel taka sorkar laipui an dawr ve theih nante, Mizoram MP te’n state mamawh hrang hrang central-a an thlente’n awmzia a neih zawk theihte Lok Sabha inthlan lo awm tur hi hman tangkai a tul tih a sawi.
BJP Mizoram President chuan, “MLA General Election-2023 ah khan BJP chu Mizoram hian hnawl tawh mah se, Lok Sabha inthlan lo awm turah chuan Pu Modi-a team a tel ngei tur BJP MP thlang tura inbuatsaih a tul takzet a ni,” a ti.
State Secretary Christopher Lun kaihhruai inkhawmah hian Vanupa Zathang, State Vice President leh Lalremsangi Fanai, State Spokesperson te’n thu an sawi bawk.