Aizawl: Meghalaya khawpui, Shillong-ah nimin neih, ‘India Japan Intellectual Conclave’ ah Labour, Employment, Skill Development & Entrepreneurship (LESDE) Minister Lalnghinglova Hmar chuan Mizoram sorkarin Mizo thalaite Japan-a hnathawk tura thawn chhuak turin tun aia lian thama kalpui a tum mek thu a sawi.
Ministry of External Affairs, Embassy of Japan leh North Eastern Council buatsaih Conclave-ah hian MP leh minister hrang hrangte bakah India, Japan leh Bangladesh atangin ambassador, high commissioner leh company-a mi pawimawhte an tel a; India, Japan leh Bangladesh insumdawn tawnna lam hawi sawiho a ni a. Conclave thupui chu ‘North East India, Bangladesh and the Bay of Bengal in the Indo-Pacific: The Way Forward’ tih a ni.
He conclave-ah hian khawvel insumdawn tawnna kawnga India-in khawchhak lam hawi a tum dan te, Japan-in investment lian tham a kalpui dan te, India hmarchhak state-te pawh he hmasawnnaah hian an tel thu te sawi lan a ni a, thawhho zel dan tur leh inpuih rawn dante zirho a ni.
He hunah LEDSE Minister Lalnghinglova Hmar chuan mi thiamte thusawina zawng zawngah India, Japan leh Bangladesh insumdawn tawnna a len tur thu leh chumi kawngah chuan India hmarchhak state-te an pawimawh thu a sawi a. Mizoram pawimawhna pawh sawiin, “He insumdawn tawnna lian takah hian Mizoram hian tel ve a duh mai ni lovin, hmun pawimawh tak chan a duh a. Hetih lai hian, kan tlin tawk a la sang lo a ni mai thei a, nimahsela sorkar thar lo piang hian hemi kawnga hmalakna awmte chhunzawm a, a hma aia chak zawka kalpui a tum a ni,” a ti.
LESDE minister chuan Mizo thalaite Japan-a hnathawk tura an kal chhuak mek thu leh, Mizoram sorkarin hei hi lian thama kalpui an tum mek thu a sawi a. Hemi kawnga thawhpui turin sorkar laipui aiawh te, state sorkar aiawhte leh company hrang hrang hotute a sawm nghal bawk.