Aizawl: Road Safety Month kalpui mek chhunga neih tura lo puan lawk tawk, ‘Ngaihdamna tel loa lirthei endik runpui,’ No Tolerance Drive chu Aizawl leh khaw thenkhatah kalpui tan a ni a, a ni khatnaah dan bawhchhia thahnem tak man nghal a ni.
Sorkarin a lo puan lawk tawh danin No Tolerance Drive hi February 12-17,2024 chhunga kalpui tur a ni a. Aizawlah chuan nimin khan transport department leh traffic police te chu transport department office kawtah an duty a, lirthei dan bawhchhia an man zingah insurance fel lo an thahnem hle.
Lirthei ke hnih nei bik, dan bawhchhia an man hi 58 tlingin, chung zinga 38-te chuan pawisa an chawi nghal a, sum tling khawm chu Rs. 72,000 a ni a, mi 20 erawhin pawisa chawi tur an la pe lo thung.
Transport department-a enforcement staff hotute chuan lirthei ke hnih nei dan bawhchhia an man zingah driving license nei lo, High Security Registration Plate bel lo te, insurance fel lo te, pollution certificate nei lote chu dan an bawhchhiat tam zualte a nih thu an sawi.
Aizawl chhunga No Tolerance Drive kalpui a nih avanga ngaih theihin nimin khan ni dang zawng aiin Aizawl khawpui chhung a thawl.
Traffic police-te sawi danin zing lam dar 8-9 inkar sikul kal hun leh office kai hun chhoah erawh traffic jamna laite a awm a, chhun lamah erawh lirthei tlan chhuak a tam loin kawngpuite chu a thawl hle a ni.