Rorel lai, ZPM party chhungkaw inthlanna neih turah executive member chuh tur hming pe lut mi 400 chuang an awm a, president post-ah mi pahnih an inkhing dawn nia thudawn a ni.
ZPM party hruaitu thlan hi February 15 leh 16-ah neih a ni dawn a, a ni hmasa zawkah elected office bearer pathum thlan a ni ang a, a tukah executive member tur mi 100 thlan a ni leh ang.
Executive member mi 100 thlan chhuah tur atana hming pek luh theih hun chu nimin khan a tawp a, hming pe lut hi mi 400 chuang an awm a, nimin tlai khan nomination paper-te hi endik nghal a ni.
Elected OB hi mahni hming pea chuh lovin floor atangin thlan a ni dawn a ni a, OB post thum president, vice president leh treasurer-a chuh turte hi a chiang chho tawh nia thudawn a ni a, president-ah hian tuna an president ni lai, Lalliansawta leh ZPM MLA VL Zaithanzama te an inkhing dawn nia thudawn a ni.
Post dang, vice president leh treasurer atan floor atanga rawt chhuah tura inruahmante pawh a hriat theih tan tawh a, an president ni mek, Sawta tlarah MLA pahnih, W Chhuanawma leh Lalchhuanthanga te an awm a, Chhuanawma hi vice president post chuh tur niin, Chhuanthanga hi treasurer atana floor atanga chhawp chhuah tur nia thudawn a ni.
President post-a thlan theih tura chhawp chhuah tur dang, VL Zaithanzama line up-ah hian vice president-ah C Laltanpuia leh treasurer-ah SL Ngursailova te an awm dawn nia thudawn a ni a, hei bakah hian Zama tlara awm tur tho hi an awm nual bawk.
Zaithanzama tlara awm tur dangte chu – vice president post-ah mi pathum – Er Vanlalneiha, RL Liantluanga leh Lt Col Lalhmingliana te hming langin, treasurer-ah Saithuami Mangpa, C Lalchhandami leh C Lalthanfela te hming a lang bawk a, line up nei hran loa mal kala vice president-a thlan theih tura rawt chhuah tur nia ngaih chu Er Lianlunga a ni bawk nia thudawn a ni.