Ruihhlo hmanga sumdawng lian, Mexican drug kingpin Joaquín ‘El Chapo’ Guzmán chu New York-a federal court chuan thubuai chi hrang hrang 10-ah thiam loh a chantir.
Kum 61-a upa, Guzmán hi cocaine leh heroin thehdarh, dan lova ralthuam kawl leh sum tihchingpennaah te court hian thiam loh a chantir a, hremna hi a la puang lo va; mahse, dam chhung lung in tang tura hrem theih a ni.
Mexican lung ina a tan laiin Guzmán hi lei verh siamin a tlan chhuak a, January 2016 khan man leh a ni a, a ni a, US-ah hian kum 2017 khan a chungthu rem tura lak luh a ni a. Amah hi US-a ruihhlo tawlh luttu lian ber nia sawi, Sinaloa drug cartel-a thuk taka inhnamhnawih nia hriat a ni.
A thubuai hi chawlhkar 11 ngaihtuah a nih hnuah US sanaa Thawhlehni chawhma khan Brooklyn-ah puan a ni a, courtroom-ah pawh mi an thu khat vek a. Guzmán hi suit jacket leh tie dumin a thuam a, thiam loh chantir a ni tih puan a nih laiin a hmelah danglamna engmah a awm lo.
Courtroom atanga hruai chhuah a nih dawnah Guzmán hian a a lawyer-te chu tha takin chibai a bik a, a dawtah a nupui, kum 29 chauhva upa, Emma Coronel chu a va pan leh bawk a. A nupui hi beauty queen hlui a ni nghe nghe.
Guzmán-a lawyer-te chuan court sang zawkah thubuai chu ngaihtuah tha leh tura hma an lak dawn thu an sawi.