Aizawl : Lawngtlai district State Day of Prayer Committee chu nimin khan DRDA Conference Hall, Lawngtlaiah an thukhawm a. Lawngtlai East bialtu MLA, Adviser to CM (H&FW) ni bawk Dr. Lorrain Lalpekliana Chinzah-in a kaihruai.
State Day-ah hian thupui hrang hrang hmanga tawngtai rualna neih a ni dawn a. Tawngtaina thupui zingah Sual thupha chawina leh lawmthu sawina bakah ruihhlo avanga hliam tuarte tan a tawngtai te pawh a tel a ni.
Kolasib-ah pawh nimin vek khan State day-a tawngtai rualna hun hman tur chungchangah Bawrhsap John LT Sanga hovin committee an thukhawm a. Tawngtai rual chu chawhma dar 10-ah Kolasib Tumpui Field-ah buatsaih ni se, an ti.
Nimin vek khan Champhai-ah pawh State day of Prayer Committee Champhai District chu Bawrhsap James Lalrinchhana hovin an thukhawm a. State day-a tawngtairual chu Champhai Sport Complex, New Champhaiah chhun dar 12 atanga zaikhawm tanin, chawhnu dar 1 atangin tawngtairual ni se, an ti.
Siaha-ah pawh nimin vek khan State Day of Prayer Committee, Siaha District chu Bawrhsap Lalhmunsanga Hnamte hovin an thukhawm a. Hun hman dan tur kimchang duang turin ‘working committee’ an din.