Aizawl : Mizorama damdawi zuartu pawl, Mizoram Chemist and Druggist Association (MCDA) te chuan Manipur tualchhung buaina avanga raltlante chhawmdawlnan Central YMA hnenah Rs. 2,12,160 an hlan. Thilpek hi Central YMA aiawhin Lalhmachhuana, President in a dawng.
Raltlante chhawmdawlna atana tanpuina hlanaah MCDA atangin an President Lalhruailiana Sailo leh hruaitu dangte an tel a. MCDA President chuan, “Manipura kan unau ten harsatna nasa tak an tawh hi kan theih anga puih ve kan duh a, a hma lamah pawh kan lo pui ve tawh a. Tun tumah hian kan member te thawhkhawm atangin tanpuina tur kan pe leh thei hi a lawmawm kan ti a, tangkai taka an hman kan beisei,” a ti.
Central YMA President Lalhmachhuana pawhin MCDA-in Manipur-a Zo hnahthlak unaute harsatna chhawmdawlna tura tanpuina an hlan chu lawmawm a tih thu a sawi a. Manipur raltlante chauh lo pawh tualchhunga damdawi mamawh hrang hrangte an lo puih tawh thinte leh, Home leh Centre hrang hrangte tan pawh nasa taka tha an lo thawh tawhnaah lawmthu a sawi bawk.