AZL: Excise & Narcotics Department (END) chuan Thawhlehni khan Aizawl Khatlaa-a an pisa bulah Myanmar atanga lak, state danga hralh tura phurh kual mek heroin thahnem tak an man.
Thawhlehni khawvar hma, dar 4:30 khan END chuan Khatla, Aizawl, Tennis Court bulah heroin kg 3 & gram 642 (Hawng 300) leh a neitua puh mi pathum, Nangzagina (50), Vanapa Section, Near AG Church, Ngur Khua, Champhai District; Roluahpuia (53), Khuangchera Section, Vengthar, Ngur Khua, Champhai District leh Faizur Rahman Barbhuiya (39), Bagha Bazar, Loknathpur, Cachar, Assam nia inchhalte chu an man.
Heroin phurhna atana hman TATA 207 (Regn No. MZ04 A-1428) pawh hrensak nghal an ni.
Heroin vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, Court-ah hruai nghal an ni.
Heroin vanga mante hi Court-in thiamloh a chantir chuan Jail-ah kum 10 atanga kum 20 thleng tangin, pawisa Rs nuai 1 atanga Rs nuai 2 thleng chawi tira hrem theih an ni ang.