Mizo National Council (MNC)-in India sorkar chu FMR sut tur leh border fencing siam a tum chu titawp turin an phut a. An kalpui tlang lui a nih chuan a tawp thlenga do an tum thu an sawi.
Nimin khan MNC chuan thuchhuah siamin Myanmar leh Bangladesh enkawlna hnuaiah Zo hnahthlakte unaute an him lo hle tih tar langin, “Zo hnahthlak inunauna tichhe tura min enkawltu ramte chuan hmalakna an kalpui zel a, kan chungah tawrhna leh thihna rapthlak tak an thlen tir mek a, kan nunna an lak mai piahah kan in leh lo leh kan Pathian biakna inte thlengin min suamsamsak hi na a ti,” tiin, tawrh thiam har an tih thu an tar lang.
Zo hnahthlakte chunga tawrhna rapthlak tak thleng mek en hian, inunau lehzuala insuaihkhawma hma lam pan a thawkhoa hmelmaten harsatna leh tawrhna thleng hi en liam mai lo va, do let a bei let turin MNC chuan Zofa zawng zawngte an sawm.
MNC chuan India, Myanmar leh Bangladesh-a Zo hnahthlak awmte inunauna leh inpawhtawnna tichhe turin India sorkar chuan a thuneihna a hmangsualin Zo hnahthlakte nekchep lehzual nan an zalenna, FMR titawpin, ramri hungna siam tuma a hmalakna chu a duh lo hle tih an tar langin, FMR tihtawp hi sut nghal tur leh ramri hung a tum titawpin hma la chhunzawm tawh lo tura an phut thu leh, Myanmar atanga an ram buai avanga Mizoram leh hmun hrang hranga raltlante Bio-Matric hmanga chhinchhiah tum a hmalakna hi titawp nghal tura an ngen thu an tar lang bawk.
Buaina nasa zawk leh harsatna lian zawk a thleng a nih chuan a mawhphurtu chu India sorkar ngei hi a ni ang tih tar langin, “Buaina leh harsatna lian zawk a thlen loh nan heng kan ngenna leh phutte hi ti nghal turin India Prime Minister Modi-a leh Home Minister Amit shah te hi kan ngenin kan hriattir nghal a ni,” tiin, India sorkarin an ngenna te ngai pawimawh lova a kalpui zel a nih chuan a tawp thlenga do in, duh lohna a lantir dawn niin MNC chuan an tar lang a ni.