Kartawp inrinni leh Pathianni zan khan Europe a tualchhung league lian zual panga, English Premier League, Spanish La Liga, Italian Serie A, German Bundesliga leh French Ligue 1 te khelh a ni leh a. Kar tawp football a hnuhma langsar kan hrut kual leh ang.
- English Premier League
Pathianni zan khan Arsenal chuan West Ham United chu 6-0 ngawtin an sawp. West Ham an sawp tum hian Arsenal captain Martin Odegaard chuan ball pass vawi 107 zet a nei a, chance vawi sarih ngawt a siam bakah assist vawi hnih a nei bawk. Odegaard hi kum 2003-04 hnu lamah hetiang ti leh thei hmasa ber a ni.
London Stadium-ah 6-0 ngawta an chak tum hian Gunners hian chawlhlawk hmain goal li ngawt an thun a, EPL season kal mekah chawlhlawk hmaa goal li thun thei pahnihna an ni a, pakhat zawk chu Aston Villa an ni.
Arsenal hian EPL season kal mekah corner atangin goal 11 zet an thun tawh a, Europe top 5 league-ah corner atanga goal thun hnem ber an ni mek.
Pathianni khan Manchester United chuan Villa Park-ah ngei Aston Villa chu 2-1 in an hneh. Villa an hnehna goal hi minute 86-naah Scott McTominay thun a ni. McTominay hian EPL season kal mekah United hi hun tawp dawn hnaiah goal thunin vawi thum a chakpui tawh a. EPL-a hun tawp dawn hnaiha team chakna goal thun hnem ber a ni a. Europe top 5 league-ah hetiang ti thei Jude Bellingham, Antoine Griezmann, Robert Lewandowski, Borja Mayoral, Serhou Guirassy leh Domenico Berardi te a nihrual bawk.
United forward Rasmus Hojlund chu EPL-ah a huangtau deuh deuh zel a, Aston Villa lakah hmahruaina goal a thun leh. Kum 21 leh ni 7-a upa Hojlund hi Premnier League-ah a zawna goal nga thun zawn thei naupang ber dawttu a ni a. A chungah hian kum 19 leh ni 239 a upa Nicolas Anelka (Arsenal) a awm.
Manchester City midfielder pawimawh Kevin De Bruyne chu hliam vanga a chawlh reng hnuin January ni 13 khan inkhel a hmachhawn leh tan a. Hetih chhung hian assist vawi 4 a nei leh der tawh. De Bruyne ang tho hian hliam vanga chawl reng Erling Haaland pawh EPL-ah goal 16 thunin, topscorer a ni ve mek bawk.
- Spanish La Liga
Pathianni zan khan an mualah vawi riat ngawt chak thei lo zawn tawh Sevilla chuan an mikhual Atletico Madrid chu si khat faiin an hneh a, an chak ve ta nawlh. Sevilla hian an muala an chak loh zawn rei record kum 1965 a mi daih tawh chu an nih rual hman hial tawh a. A chhe lama record thar siam thei an nih laiin an chak ve ta nawlh a ni.
Champion lai Barcelona nen 3-3 a an inhnehtawk tumin Granada in Manchester United atanga an hawh mek Facundo Pellistri chuan goal a thun a, assist a nei bawk. Pellestri hi kum 22 leh ni 53-a upa a ni a, Kum 2000 hnu lamah Barcelona muala goal thun a, assist nei thei bawk naupang ber a ni.
La Liga champion lai FC Barcelona hi kum 2004 bikah an che chhe hle a, game 11 atangin goal 23 zet an chhuah tawh. Kum 2024 bikah hian Europe top 5 league zinga goal chhuah tam ber dawttu an ni hial a. Anni aia goal chhuah tam awmchhun chu game sarih atanga goal 22 zet chhuahtu Frosinone an ni.
- Italian Serie A
Table-ah pathumna luah mektu AC Milan chuan khelh 24 atangin point 52 an hmu der tawh. Khelh 24 atanga point 52 an hmuh hi 2003-04 hnu lama an chet that leh ber tum a ni. Serie A-ah khelh 24 atanga point an hmuh tam ber chu 2003-04 season a ni a, point 61 an hmu. 1995-96 season khan khelh 24 atangin point 53 an lo hmu tawh bawk.
Lazio player pawimawh Ciro Immobile chuan Inrinni zanah 3-1 Cagliari an hneh tumin goal khat a thun a, Immobile hian Serie A-ah goal 22 a thun tling chiah. Serie A-ah goal 200 thun tling thei pariatna a ni a. Kum 45 liam ta chhungin Serie A-ah hian goa 200 thun tling thei pali chiah an awm a, Immobile hian Roberto Baggio (205), Antonio Di Natale (209) leh Francesco Totti (250) te hnung a zui.
- German Bundesliga
Bayer Leverkusen defender Álex Grimaldo chuan season kal mekah goal contribution vawi 17 zet a nei tawh a. Hei hian season 15 liam ta chhunga defender in goal contribution a ngah ber record a tluk der tawh.
Bundesliga hmahruai mektu Bayer Leverkusen hian an elpui lian Bayern Munich chu inrinni zan khan 3-0 ngawtin an sawp a, Bundesliga-ah khelh 31 chhung zet tlawm an nei tawh lova, vawi 27 an chak a, vawi li dang an khingpuite nen an inhnehtawk. Bundesliga-ah tlawm nei lova kal tluang rei ber Bayern Munich record chu khelh khat chiah an phak lo mek a. Bayern Munich in 2019-20 chhunga record an siam hi khum thei dinhmunah an ding mek.
Leverkusen hian game 21 atangin point 55 an hmu a, hei hi Bundesliga chanchinah game 21 atanga point hmu tam ber pathumna a ni a. Per Guardiola-a’n Bayern Munich a enkawl chhung khan game 21 atangin point 59 leh point 55 a lo hmuhpui tawh.
- Belhna – Afcon
Pathianni zana Afcon 2023 final khelhah Sebastien Haller goal thun hmangin Ivory Coast chuan 2-1 in Nigeria an hneh a, an champion. Cancer dam leh Haller hi Afcon final-ah Ivory Coast chakna goal thun hmasa ber a ni a. Elephants hi Afcon-a an champion tawh vawi hnihah penalty atang ve ve in an champion. Ivory Coast hi Afcon-ah vawi thum chin champion thei pangana an ni.
- Asian Cup
Inrinni zana AFC Asian Cup 2023 final khelhah 3-1 a chak Qatar an champion. Qatar hi kum 1992 hnu lamah Asian Cup thlengtu ram champion leh thei hmasa ber niin Japan hnung an lo zui tawh a. Japan hnung vek zuiin Asian Cup-a champion zawn leh thei hmas aber a ni bawk.
Qatar in Jordan an hnehna goal thumte hi Best player ni zui ta Akram Afif thun vek a ni a. Afif hi Asian Cup final khelh tawh zawng zawnga hattrick siam thei awmchhun a ni.