Chanchinbumi huaisen, chawimawina pawh lo dawng tawh, Philippine journalist Maria Ressa chu Thawhtannia man a nih hnuah nimin khan chhuah a ni a, man a ni hi khawvel ram hrang hrangten nasa takin an ram sorkar an dem phah.
Ressa-i hi news website lar tak, Rappler-a an CEO a ni a, sorkar a sawisel avangin a headquarters-ah Nilaini khan National Bureau of Investigation agent-ten an man a. Press zalenna atana thawktute chuan sorkarin chanchinthar thehdarhtute ngawi tura a beihna nia ngaiin sorkar an dem hle a ni.
Ressa-i hi ‘cyber-libel’ an tih mai bawhchhiaa man niin kum sarih chuang zet chhungin sumdawng lian leh judge hlui thawhho dan vel a tar lan avanga man a ni a. Thiam loh a chan chuan kum 12 thleng pawh lung in tang thei a ni.
Libel law an tih hi inhnialna tam tak siamtu a ni a, September, 2012 atanga hman tan a ni a, Ressa-in chanchin-thara a ziah hnu thla 4-a hman tan tihna a ni a. Kum 2017 pawh khan a lakah hian thubuai siamsak a ni tawh a; mahse, NBI chuan dan hman atanga kum khat chhung ngaihhnathiamna a neih avangin chhuah a ni.