Myanmar rama court chuan kum 2017-a Aung San Suu Kyi-i adviser rin tak, Ko Ni thah avangin mi 2 thiam loh a chantir a, thi turin an chungthu a rem.
Court hian silai hmet puaktu, Kyi Lin chu tual a thah avang leh dan phal lohva mi thah nana ral-thuam a kawl avangin thiam loh chantirin hremna a pe a. A thawhpui, Ko Ni a thah theih nana remruatpuitu pawh thi turin a ti ve nghal bawk a ni.
He tualthahnaa in-hnamhnawih dang pahnih erawh lung in tang tur chauhva hrem an ni a. Mi dang pakhat, he thil thlenga an thluak bur ber nia hriat erawh tun thlengin man a la ni lo thung.
Ko Ni hi Suu Kyi-i kaihhruai, National League for Democracy rinrawl leh an thurawn lakna ber pakhat a ni a, sipai thuneihna hnuaia an awm tawp lam, mipui rorelna an neih dan lai vel phei kha chuan a thu rawn hi an la tam hle a ni.