Aizawl: Transport Minister Vanlalhlana’n ram mipuite chu dan bawhchhe lova a hun taka lirthei document te update tha a, chhiah pe thin turin a chah.
Nimina Mizoram Transport Workers’ Association (MTWA)-in Assembly an hmannaah transport minister chuan mipuite hnena thuchah hi a sawi a, chhiah pe tha tura mipui a ngen bakah nu leh pate chu an fa, kumtlinglote lirthei khalhtir lo turin a chah bawk.
Hlana chuan transport department chu mi hausa leh rethei, thalai deuh atanga kum upa zawkte thlengin an dawr thin mipui huapzo department an nih angin sorkar hmingthat leh hmingchhiatah pawh mawhphurtu pawimawh tak an nih thu sawiin, thawktute chu an puanven sawichhing a, trang sauh sauh turin a chah.
Sorkar kum kalta-a cheng vaibelchhe 50 zet chhiah an hmu thei chu thawktute inpekna a nih thu leh fakawm a tih thu a sawi a; dikna leh rinawmna nena an hna chanpual theuhte tha taka thawk zel turin a chah bawk.
MTWA-in General Assembly Vawi 34-na an hmannaah hian Director Er. R. Lalrammawia leh MTWA President F. Lalzuithanga ten thu an sawi bawk a, an member pension-a chhuakte thlana hun te, member boral te sunna hunte an hman bakah hruaitu thlanna leh rorel inkhawm an nei bawk a ni.