Aizawl: Excise & Narcotics Minister Lalnghinglova Hmar hovin nimin khan Central YMA leh Excise Department hotute chu Tuikhuahtlanga Central YMA pisa-ah an inkawm a, ruihhlo do kawnga thawhho dan tur an sawi ho.
An inkawmnaah Excise Minister Lalnghinglova Hmar chuan Central YMA-in ruihhlo do kawnga theihtawp chhuaha an hnathawhte a hriatpui thu leh ropui a tih thu a sawi a. Excise department nen theihtawpa tanho leh thawhho a tul thu a sawi. Ruihhlo dona kawngah thurawn inpe tawn tur leh hmalak dan turah inpuitawn zel turin a chah bawk.
An inkawmna kaihruaitu Central YMA President Lalhmachhuana pawhin, Minister-in ruihhlo dona kawnga YMA te hnathawh hriatpuia Central YMA Office a tlawh chu lawmawm a tih thu a sawi a. Theihtawpa tan lak zel an tum thu leh Excise dept te nen pawha inpawh tak leh pheikhai rual taka thawhdun zel a duh thu a sawi.
Inkawmhonaah hian ruihhlo do kawnga hmalakna zel turah thawhho dan tur te sawihoin, ruihhlo do kawngah Excise & Narcotics Department-te leh Central YMA ten pheikhai rual tak leh inpawh tak a thawhho leh ruihhlo do kawngah a theih ang angin inpuih tawn zel nise an ti.
He hunah hian Excise Minister Lalnghinglova Hmar in ruihhlo dona atan Central YMA hnenah Rs. 50,000 a hlan nghal bawk.