Aizawl : Mamit khawpui chhung, chhuah lam leh tlak lam kawngpui siam hnathawh mek, PWD Mamit division enkawl chu Nilaini khan Mamit District MJA member te leh he kawng siam enkawltu PWD hotute leh contractor ten an enho.
He kawng siam hna hi ni March ni 31, 2023 ah thawh tan niin, March ni 31, 2024 a thawh zawh tura ruahman a ni a. Tuna hna kallai mekah 93% an thawk zo tawh niin, PWD hotute chuan an sawi.
Mamit ring road hnathawh-ah hian blacktop a tel lova, widening, culvert & retaining wall siam hna thawh zawh tawh a ni a, WBM phah hnathawh mek niin, tlaklam chu thawh zawh tawh a ni a, chhuahlam thawh leh mek a ni. An hnathawhah mipui lamin tha tawk lo leh lei an phah nia sawi awm chu thuthar thehdarhtute chuan a hmunah enin, hnatawktute chu an zawtfiah a, an work manual-in a phal ang leh siam dan tur nia a sawi anga thawh a nih thu leh an hmanraw hman te a chhiat loh thuin an chhang.
Blacktop nghal theihna tur sum a awm loh avangin tuna an thawh chinah sum awm dan nena enin a tha thawkhat nia an ngaih thu thuthar thehdarhtute chuan an sawi a. Kawngpui bakah culvert leh retaining wall engemawzat siam a ni a. He hnathawktu contractor te pawh PWD Engineer ten an vil tha hle niin an sawi bawk.