Burma nena kan inkar ramri hung chungchanga kan chief minister Delhi zinhawng thusawi atang chuan ngaihdan siam thiam a har hle mai. Ramri hung chungchang lo helh vak a ngai lo a ti a. Mahse, an hung dawn lo a ti ngam bawk silova. Mipui hnena helh lo tura a han ti ngawt hi lem duak duak chu a har hle. A aia thuchiang awm thei se a va duhawm em.
Ramri hung hi a puangtu chu Union home minister Amit shah a ni a. A sawi satliah nilovin, mipui hmaah vawithum ngawt a sawi tawh a. National media lam atanga han chhiar chuan Burma ramri hi hung ngei a tum a. Manipur ah bul tan an tum thu thlengin a sawi a. Nagaland leh Mizoram lamah duh lohna thawm a awm a. Heng duh lohna thawm awmte pawh hi NGO tlemte in lo duh lo mahse kan hung dawn tho a la ti ta deuh deuh a. Hetiang anih avang hian kan thinlungin a helh a. Hung ani dawn lo ani tih hi kan chian thlap hma chuan kan rilru in a vei tawt tawt a ni. Thuchiang awm se, hahdam taka hung a nih loh tur thu dawn tluka châk kan nei awm love. Na taka kan ram leh kan hnam nghawng tur ramri hung hi lo vei suh u tih ngawt hleih theih ani lova. A bik takin ruling party lama mi tangkai deuh ten ramri hung a pawi loh thu an han sawi rik zeuh pawh hian mipui thin a thawng nghal a. A chhan chu union minister leh CM inbiakna hre phak ber ten hung pawi an ti lo anih chuan an hung ngei dawnah mipuiin kan ngai tlat a ni. Helh lo tura in hrilh ngawt theih ani lova. Kan ram tana kan ngaihtuahnaah hung hi a pawi em em a. Chu thil pawi em em mai chu a lo thleng tak tak ang tih kan hlau a. Duh loh dan dan hian thil a kal ang a, tum loh deuhin mizote rilru ani lo zawnga chawk tho in buaite pawh hi a intan leh lo ang tih a sawi theih hek loh a. Chuvangin kan CM thusawi hi he thu ah hian hei ai hian chiang thei se a va duhawm em. Rilru nuam leh hahdama mipui min dahna tur chu Burma leh Mizoram inkar hung anih dawn loh thu puan hi a ni.
Tuna sawrkarna chang thar ZPM hi a hmaa mite aiin mipuiin kan beiseina a sang a. An hmabaka awm mipuite tana thaah chuan i he lova thlawp zui zel hi kan inpeih em em tih a hriat a. Mahse, politics ah hian mipui ngaihdan nilo zawnga ke pen thin chu mualpho taka paih an ni thin tih hre turah ngai bawk ila. Mipui duh dan lo zawnga ke pen chu mipui vêk hian an dim hauh lo tih chu hmanni lawkah kan fiah a. Khatiang dinhmun kha tuna sawrkar mekte chan hi ani ve thei tho tih hria se. Mipui duh loh zawng nilovin, mipuite tana tha tur hi han bei ngat ngat zel se, India ram hruaitute hmaah pawh kan thlawp zel dawn tih pho lan hi kan inpeih reng a ni.