Mizoram Super League (MSL) 9 khelh mekah champion lai Khatla TBL chuan ningani zan khan hnehna an chang a, Mission Veng Hotshots an hneh. Ningani zana inkhel dangah Champhai in Chanmari Vikings an hneh ve bawk.
Champion lai Khatla TBL hian season thara an khelh hmasak berah Zarkawt BCA an hneh lo nghal a, bul an tan tha lo. Team lian BCA lakah tlawm mah se an insiamtha nghal a, Mission Veng Hotshots lakah phu takin hnehna an chang. Hotshots an hmachhawn tum hian bul an tan tha a, quarter khatnaah point 8 in chungnung zawkah an tang nghal. Quarter hnihnaah an khel tha chhunzawm a, point riat bawkin an chungnung zui leh a, point 16 zeta hmahruai chungin chawlhlawk an hmang.
Chawlhlawk hnu lamah TBL an inthlahdah hret a, quarter thumnaah point 13 zetin hnufual zawkah an tang a, chak tur zawk a chian loh thar phah. Quarter hnuhnung berah chak ngei tumin TBL in tan an khawh thar leh a, point 8 in an chungnung zui leh a, point 81-70 in hnehna an chang zui ta a ni.
Season thara an chak hmasak ber tum hian Khatla TBL tan MSL MVP Joshua Aaron Keys a hmuhnawm viau a, Keys hian point 22 a thawkchhuak. TBL tana Mizo player chetha ber Vanlalthazuala chuan point 14 a thawkchhuak. Misson Veng Hotshots tan Chrsitopher Michael Galbreath Jr a chetha viau a, point 35 zet a thawkchhuak.
Ningani zana inkhel hnuhnung zawkah Chanmari Vikings leh Champhai Basketball Club ten inkhel hmuhnawm an lantir. Vikings laka bul tan tha lo Champhai in harsa takin hnehna an chang let.
Champhai BC hi quarter hmasa berah point 11 zetin Vikings laka an hnufual a, bul an tan tha lo hle. Bul tan tha lo mah se an insiamtha thuai a, quarter dang pathumah chungnung zawkah an tang ta vek. Quarter hnihnaah point liin an chungnung a, quarter thumnaah point khata an chungnung leh hnuin quarter hnuhnung berah point 12 zetin an chungnung zui leh ta mai a. Team hlun Chanmari Vikings lakah point 77-71 in hnehna an chang zui ta a ni.
Vikings an hneh theih nan Champhai BC tan Lalropuia a khel tha viau a, point 25 a thawkchhuak a. Champhai BC tan hian Tevis Ryan Robinson Jr chuan point 21 a thawkchhuak ve bawk.
MSL 9 hi vawiin tlai dar 5:00 ah khelh chhunzawm a ni ang a, Bungkawn LB Associates leh Zarkawt BCA ten bul an tan ang a. Zan dar 8;00-ah Nursery SC leh Chanmari Vikings an inkhel ve leh ang.