Zirtawp zing khan NBA 2023-24 regular season-ah inkhel pathum a awm a, team talbuai Golden State Warriors in hnehna an chang ve ta nawlh. Inkhel dangah Memphis Grizzlies leh Minnesota Timberwolves in hnehna an chang bawk.
Western Conference-a hmasawn hleithei lo Golden State Warriors hian an mahni ang thova chetha lo Utah Jazz an hmachhawn a, inkhel hmuhnawm takah point thumin hnehna an chang thei hram. Warriors leh Jazz te hi an inhnehtawk hle a, an inlehthal tawn zak zak. Quarter hmasa berah point thumin Jazz an chungnung a. Quarter hnihnaah point liin Warriors an chungnung ve thung a, point 1 a hmahruai chungin chawlhlawk an hmang.
Chawlhlawk hnu lamah Warrios an khel tha chhunzawm a, quarter thumnaah point ngain an chungnung zui leh. Quarter hnuhnung berah Jazz in chak ngei tumin an khingpuite an nawr let chiam a, point ngain chungnung zawkah tang bawk mah se Warriors lakah hian point 140-137 in tlawm zawkah an tang ta tho a ni.
Jazz laka an chak tum hian Warriors player pawimawh ni reng thin Klay Thompson chu bench atangin a lut a, hei hi kum 12 zet hnuah bench atanga a luh vawi khatna a ni hial. Thompson hian a dam phawt chuan Warriors tan bul a tan zat zat a, NBA regular season-ah vawi 727 zet bul a tan tawh. Player pawimawh a nih chhoh char char laiin hliamin a tibuai a, a dam hnuin bench atangin a vawi khat nan a lut. Warriors tan bul a tan lohna hmasa berah hian point 35 zet a thawkchhuak a, hei hi season kal meka point a thawhchhuah tam ber tum a ni hial nghe nghe. Thompson hian NBA-ah point 15,000 a thawkchhuak tling tawh a, NBA-ah hetiang ti thei 153-na a ni a. Golden State Warriors player zingah point 15000 thawkchhuak thei parukna a ni bawk.
Jazz laka chak Warriors hian Western Conference-ah 10-na an luah chhunzawm a. Vawi lo tlawm zawn tawh Utah Jazz hi 11-naah an awm ve thung.
Zirtawp zinga inkhel dangah Memphis Grizzlies chuan Milwaukee Bucks chu point 113-110 in an hneh hram a. Hetihlai hian Minnesota Timberwolves chuan an khingpui Portland Trail Blazers chu point 37 zetin an lo sawp ve thung.