February 15, Ningani zan khan UEFA Europa League last 16 play-off first leg khelh a ni a, Serie A club lian AC Milan in awlsam takin hnehna an chang. Awlsam taka Milan an chak laiin AS Roma an chak zo lo thung.
Serie A club lian, Europe a tawnhriat ngah AC Milan hian an mual Stadio Giuseppe Meazza-ah French club Rennes an mikhual a, an mualah si thum faiin hnehna an chang. Milan tan hian Ruben Loftus-Cheek chuan minute 32-naah hmahruaina goal a thun. Loftus-Cheek goal thun hmang hian si khat faia hmahruai chungin chawlhlawk an hmang.
Chawlhlawk hmain goal khat chauh thun mah se chawlhlawk hnu lamah Milan an khel tha lehzual a, goal hnih an thun belh thuai. Second half tan atanga minute hnihna lekah goal hmahruai thuntu Ruben Loftus-Cheek chuan goal thunin an hmahruaina a tizau. Si hniha hma an hruai hnuin Milan an khel tha chhunzawm a, goal an thun leh thuai. Minute 53-na lekah Rafael Leão chuan an goal thumna a thun a, an chakna a nemnghet. Inhnaihchilh takin goal hnih thun mah se Milan hian hun tawp thlengin goal an thun belh thei tawh lova, an mualah si thum faiin hnehna an chang.
An mualah si thum faia an chak vangin Milan hian last 16 an hnaih viau tawh a, second leg-ah an che sual viau a nih loh chuan last 16 an lut ngei tura ngaih a ni.
Awlsam taka AC Milan an chak laiin AS Roma chuan harsa takin Feyenoord lakah tlawm an pumpelh ve thung. Roma hi Feyenoord Rotterdam hmachhawn turin De Kuip, Rotterdam-ah an lenglut a, mikhual an nihna hmunah goal an chhuah hmasa. Mualneitu Feyenoord tan hian Barbosa da Paixão chuan chawlhlawk dawn hnaih minute 45’+1-ah goal a thun a, si khat faia hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun tumin team hnihte an innawr tawn nasa hle. Inelna neih meka chetha tluang tak Romelu Lukaku chuan minute 67-naah Spinazzola siamsak atangin goal a thun a, an si phurh a sut. Lukaku hian Europa League khelh mekah goal 13 a thun der tawh a. Goal thun lohna match khat chiah a nei nghe nghe. Lukaku goal thun hnu hian goal dang a luh belh thei tawh lova, Roma leh Feyenoord te chu 1-1 in an inhnehtawk zui ta a ni.
Ningani zana inkhel dangah FK Qarabag chuan 4-2 in mualneitu Braga an sawp a. Benfica, Sporting CP leh Galatasaray ten hnehna an chang bawk.
2022-23 season atang khan Europa League-ah hian last 16 luh dan thar an duang a, group hrang hranga champion te theuhin direct in last 16 an lut nghal a. Group hrang hranga pahnihna te theuh leh champions league atanga tlahniam ten last 16 lut tur zawnna playoff an khel a. Double leg-a hnehna chang zawk zawkin last 16 an lut ve leh thin.