Manipur-a tharum thawhna thleng chuan ziaawm lam a la pan thei tak tak lo va, district collector chenna in hal a ni a, mini secretariat-a bula venhim hna thawktute lirthei hun hal a ni bawk.
Churachandpur district-a buaina chhuakah hian mi pahnih an thi a, venhim hna thawktute hian Ningani zan tlaia sorkar hmun, police superintendent leh district collector pisa awmna luhchilhtu mipuite hnawh darh nan hian silai an hmet puak a ni.
He thil thleng avang hian state sorkar chuan Kuki tamna, Churachandpur district-a cellular data service chu ni nga chhung atan a titawp lailawk nghal.
Thupek a chhuahah Joint Secretary (Home) Mayengbam Veto Singh chuan ‘vantlang nun kal zawnga’ cheten social media hmangin ‘mipuite an fuihpawrh’ niin a tar lang a, hei hian dan leh thupek kenkawh a tiharsa niin a sawi.
“Nunna hloh, sorkar leh mi mal thil tihchhiat, vantlang himna tihderthawn leh inlungrual lohna a thlen a hlauhawm a ni,” tiin tar lan a ni bawk.
Thupekah hian sorkar chuan hetiang thil thleng palh leh thei leh boruak tha lo dang inmung thei ven nan Churachandpur-ah hian VPN hmanga pek chhuah mobile internet/data service chu ni nga atan tihtawp lailawk a ni tih tar lan a ni.
Manipur Police chuan thite chungchang hi engmah sawi an la nei lo va; mahse, mi thenkhat chuan Churachandpur-a cheng, Letlalkhuol Gangte leh Thanggunlen Haokip an nih thu an sawi a. Churachandpur District Hospital thuneitu pakhat chuan silaia kahna vanga thi an nih thu leh hliam eng emaw zat an awm thu a sawi bawk.