Aizawl: I&PR Minister Dr. Vanlalthlana chuan mipuite hriat tur pawimawh sorkar thu leh hla, scheme leh hamthatna awmte zau zawka puanzar kawngah media platform hrang hrangte tangkai lehzuala hman a tul thu a sawi.
Zirtawpni khan Mizoram Information Service Association (MISA) Annual Conference 2024 chu I&PR Auditorium, Treasury Square-ah neih niin, he huna khuallian I&PR Minister Dr Vanlalthlana chuan I&PR department chu department pawimawh tak, mipuite hriat tur information pek chhuah mai bakah inlaichinna tha, public relations kengkawhtu a nih tel thu sawiin, thawktute chu sorkar, mipui leh media-te inkarah inlaichinna tha zawk a awm theih nan a nihna vawngnung zel turin a chah.
Dr Vanlalthlana chuan sorkar laipui leh corporate-te nena inlaichinna tha zawk a awm theih nana relationship manager siam kawngah ngaihtuahna sen tlan a tul thu thu a sawi a. Mipuite hriat tur pawimawh sorkar thu, scheme leh hamthatna awmte zau zawka puanzar kawngah media platform hrang hrangte tangkai lehzuala hman a tul thu a sawi.
I&PR minster hian Allocation of Business-a lang, hmalakna tur 15-te tha taka kalpui a nih theih nan tan lak tlan a pawimawh thu sawiin, sorkarin a ngaihpawimawh Sustainable Development Reform Policy (SDRP) leh sorkar policy-te ngaihven tlang tur leh mipuiten an tangkaipui theih nan zau zawka puanzar kawngah ngaihtuahna seng zel turin a chah bawk.
He hunah hian khualzahawm Teresy Vanlalhruaii, Secretary, I&PR pawhin thu a sawi.
Inkhawm hi MISA Secretary Andrew H. Lalremruata’n a kaihruai a, MISA President F. Lalfakzuala leh MISA Patron & I&PR Director, C. Lalnunkima te’n thu an sawi bawk.