Chief Minister Lalduhoma’n nimin khan Mizoram State Public Grievance Redressal & Monitoring System thar, ‘Mipui Aw’ chu Chief Minister Conference Hall-ah a tlangzarh a, a kaihhruai sorkar chu mipuite aw ngaithla turin a inpeih reng tih a sawi.
Mipui sorkar, langtlang sorkar an din theih nan mipuite nen inpawhna tha tak an neih a ngai tih sawiin Chief Minister Lalduhoma hian, “Mipuite ngaithla turin kan inpeih at reng a, keimahni duhna aia mipuite duhna dah hmasak hi kan inhuam a ni. Chu chu mipui rorelna ram democracy innghahna pawimawh a ni,” a ti.
DP&AR Minister K. Sapdanga, Home Minister ni bawk pawhin thusawiin, March 1, 2012 khan Mipui Aw hi a version hmasa lo hman tawh a ni a, kum 2019 laihawl atang khan security thilah a him tak loh avangin an hmang zui ta lo va. Hun eng emaw chen an neih loh hnuin tunah chief minister hmalakna zarah a thar tha zawk an han nei ta chu lawmawm a tih thu a sawi a. Mipui Aw hi sorkar tha neih theihna tura Mizoram mipuite sorkarin a chona a nih thu a sawi.
R. Lalramnghaka, IAS, Secretary, DP & AR kaihhruai tlangzarh inkhawma tar lan a nih danin Mipui Aw buaipui hna chu May 11, 2023 a thawh tan niin, tun thla hian zawh fel a ni a, nimin khan hawn nghal a ni.
A siam nan hian a hranin sorkar pawisa sen a ni lo va, Mizoram State e-governance Society mi thiamten an siam a ni a. Private company tihtirin Rs nuai 10 chuang man tura ngaih a ni.
Portal hi sap tawng emaw, Mizo tawng duh zawk zawka kalpui theih a ni a, a hman dan inzirtirna (tutorial) pawh dah nghal a ni.
Mipui Aw hi khua leh tuiten an harsatna te, an vuivaina te, an chanvo te an zawhfiah theihna tur a ni a, a address chu www.mipuiaw.mizoram.gov.in a ni.