- Lalhminghlua NKB
Mizoramah hian kohhran leh pawl (Association) hrang hrang kan awm nual a, kan la awm belh zelin a rinawm. Ni, thla leh kum a liam zel a, Mizoramah hian kohhran a ni emaw, kohhran huam chhung ni lo pawl hrang hrangte hian din champhaphak, kum chuti zahna, day/vawi chuti zahna tiin eng eng emaw Jubilee lawm kan intih hmuh mek chu a nih hi. Hetiang hunah hian kum zat leh vawi zat hi kan hriatpawlh thin niin a lang.
Kan hma lawkah Mizorama mipui punkhawmna lian ber ni thin KTP General Conference chu Ngopa khuain an thleng dawn a, hemi pual hian KTP ten General Conference an lo neih tawh zat vawi 60-na pualin programme ropui tak buatsaih an tum a ni. Hemi KTP General Conference hi vawi 60-na chiah a nih avangin an chhiar dan hi a dik chiah a ni. Chutihlaiin kumin 2024 KTP Day (Dt. 16th February, 2024) kha Mizoram chhunga Branch KTP leh Bial KTP thenkhat ten a kum zat leh a ni (day) thlen zat kha hriatpawlh palh kan awm niin a lang. Kan hriat theuh angin KTP hi Dt.16-2-1954-ah din a ni a, kumin 2024 hi KTP-in kum 70 a pumhlumna chiah a ni a, a day ang zawng chuan a din ni February ni 16, 1954 chhiar tel khan KTP Day vawi 71-na a ni chiah thung a ni. Kum zat leh Day zat hi a dang tih hriat hran a tha hle. Hetiang chungchangah hian a buatsaihtu Central KTP lama hruaitute thil an lo chikin an fakawm em em thin e.
Tuna kan han sawi zulzui khian kum tin hian Mizorama pawl lian ber YMA chuan YMA day kan hmang ziah a, mahse YMA Day chuti zat tiin ram pum deuh thaw hian kan sawisualin kan ziak sual fo mai. YMA hi kum 1935 June ni 15-ah din a ni tih kan hre vek a. Nikum kha han sawi let lawk ta ila; nikum 2023 June ni 15 kha YMA-in kum 88 a tlinna chiah a ni a, YMA day ang zawng chuan vawi 89-na a ni thung. Chutiang a nih lai chuan YMA Branch thenkhat chuan nikum 2023-a YMA-in kum 88 a pumhlumna kha YMA day vawi 88-na kan ti fur maia kha kha a dik tawk lo deuh a, a vawi ang zawng chuan a vawi 89-na a ni thung a ni.
Hetiang ‘Day/vawi’ chungchang hi han sawi kai thui zel ila; Mizoramin rambuai avanga Remna ni kan hman thin hi Sawrkar hrang hrangah hian lawm uar bik leh uar lo bik kha an awm thin niin a lang a. CYMA hmalaknain kum 2016 khan Remna ni kha ropui taka lawm a ni. Khatah pawh khan Branch YMA, Group YMA, Sub-Headquarters YMA bakah CYMA thleng khan Remna ni kan lawm zat kha ziah dik loh a ni fur mai. Kum 2016-a Aizawl Sipai lammuala Remna ni kan lawmnaah khan khuallian chu khatih hunlaia Mizoram Governor Lt. Gen. (Retd.) Nirbhay Sharma a ni a, programme-ah khan ‘Remna ni vawi 30-na lawmna programme’ tih hi an chhu kuau mai a. Khami kha Vawi 30-na ni lovin vawi 31-na ni tur zawk niin a lang. Mizoramin Remna kan neih kha Dt.30-6-1986-ah a ni a, khami ni kha Remna ni vawikhatna a ni nghal ta a, chuan kum 2016 June ni 30 kha Mizoramin remna ni vawi 31 kan thlenna chiah a ni thung. A kum ang zawng erawh chuan kum 2016 kha Remna kan neihin kum 30 a pumhlumna chiah a ni bawk a ni.
A chunga kan sawi ang khian India ram pumin kum tin kan lawm thin Independence day pawh hi a kum zat leh a vawi zat hi sawrkar department thenkhat thuchhuah te, Local Cable leh chanchinbu thenkhat hian kan sawi dik lo fo mai thin. Tun atang chuan kan thuchhuah tur leh kan sawi tur hi fimkhur takin i chik lehzual theuh ang u. Tin, KTP, TKP, PYD, YMA, Remna Ni, Independence day, Mizoram State day etc. ah hian a kum zat leh a day/vawi zat hi hriatpawlh loh hram hram i tum bawk ang u.