State thenkhata khap a ni a, hunbi neia zawrh hun siam an awm a, thenkhatah khap tuma hma lak mek a ni bawk a. Hetih lai hian Social Justice & Empowerment Minister Thawarchand Gehlot chuan India ram chhunga zu in mi vbc 16 chuang an awm mek niin a sawi.
Gehlot hian ministry leh AIIMS-a National Drug Dependence Treatment Centre-in ram chhunga survey an neih atangin zu in mi zat hi an hre thei tih a sawi.
New Delhi-a nimina thuthar lakhawmtute a kawmnaah minister chuan survey nei hian district 186-a chhungkaw nuai 2 chuang luhchilh a nih thu a sawi a. Tun survey hi kum 15 zet neih a nih tawh loh hnua neih leh hmasak ber a nih thu a sawi bawk.
Minister chuan tun survey an neihin a tum ber chu state leh union territory tina zu in mi awm zat hriat an duh bakah an thil hmuhchhuah azirira hma lak dan tur hriat nan a nih thu a sawi a. An survey atanga an hmuh dan chuan zu in mi 38 zela mi pakhat chauhvin zu in mi an nih avanga enkawlna (treatment) an dawn thu a sawi bawk.
Gehlot chuan Tripura, Andhra Pradesh, Punjab, Chhattisgarh leh Arunachal Pradesh te chu zu in mi an tam zualna state a nih thu a sawi a. Zu in mi 5 zela pakhatte chu enkawlna rang taka mamawh an nih thu a sawi bawk.
Survey-a an hmuh dan chuan thla 12 liam ta chhung khan mi vbc 3 chuan ruih nan cannabis atanga siam chhuah ruihhlo an hmang tih a sawi bawk.