India-a inthlanpui a hnaih mek laiin state lian, Madhya Pradesh-a Congress chhungkuaah buaina a inmung mek a. An hruai hlun, Kamal Nath-a chu an party-ah a ‘hlim lo’ nia sawi niin BJP a zawm dawn nia sawi a ni.
Madhya Pradesh chief minister hlui hian Inrinni khan Delhi a thleng a, hei hian titi a siam nasa zual a. Pathianni thleng erawh chuan Prime Minister Narendra Modi leh Home Minister Amit Shah a la hmu lo va, BJP state hruaitu dangte erawh chuan an party-in an lo lawm tih an sawi tawh thung.
Lok Sabha-a vawi kua zet a lo tlin tawhna, Chhindwara mipuiten an bialin hma a sawn ve theih nan BJP zawm se an duh nia sawi a ni.
A bial thin hi tunah chuan a fapa, Nakul Nath-a’n a vawm mek tawh a, an fapa hian BJP zawm an duh nia sawi a ni a. Nakul-a hian social media-a a nihna a ziah thin pawh thlakin ‘Congress’ tih a paih tawh a, hei hian sawi a titam zual a, mi thenkhat erawh chuan a dah lai pawh khan party hming a ni lo niin an sawi thung.
Nath-a’n Delhi a tlawh lai hi Inrinni leh Pathiannia BJP thutkhawm pawimawh, ram chhung hmun hrang hrang atanga an hruaitu langsarte an fuan khawm lai tak a ni.
Congress atangin a la bâng lo va; mahse, kum 50 liam taa a zawm lai party ang kha chu a ni tawh lo va, an hruaitute lakah a lawm vak lo nia sawi a ni.
“Bharat Jodo Nyay Yatra lamah Rahul Gandhi-a a buai em em a, an hruaitu dang – Jairam Ramesh, KC Venugopal leh Randeep Surjewala ten an hruai ringawt rih a ni,” tiin a sawi nia tar lan a ni.
Rajya Sabha inthlana an dintir loh avangin a lungawi lo nia sawi a awm bawk a, an hruaitu hlun, Digvijaya Singh-a’n party chhuahsan turin a ngen nia sawi a ni bawk.
Congress erawh chuan Nath-a’n an party a chhuahsan dawn tih chu an pha a, prime minister hlui, Indira Gandhi-i pawhin kum 1979-a a campaign laiin a ‘fapa pathumna’ ti hiala a sawi a nih thu an sawi.
“Indira Gandhi-a ‘fapa pathumna’ hian Congress a chhuahsan ang maw? Chief minister-a siamtu, rim taka thawka a kaihhruaina hnuaia assembly inthlan a lo hmachhawnpui worker-te a kalsan ang maw?” tiin nikum inthlana an party an chet chhiat em avanga amah thlaktu, state Congress chief ni mek, Jitu Patwari chuan a sawi.
Nath-a hian Congress a chhuahsan tak tak a nih chuan inthlanpui a hnaih tawh em avangin an party chuan an tuar hle thei tura ngaih a ni a. Grand old party hi tun hnaia an hruaitu lawkten an chhuahsan nual a, Maharashtra chief minister hlui, Ashok Chavan-a pawhin kar hmasa tir khan BJP a zawmsan.
A chhuak a nih chuan kum 2019 inthlanpuia bial khat chauh an lakna, Madhya Pradesh-ah hian Congress chu an derthawng zual dawn hle a ni.
A lo thawhpui tawh thin, tuna union minister ni mek, Jyotiraditya Scindia-a pawhin kum 2020 khan a thuihhruai eng emaw zat nen BJP an zawmsan a, Madhya Pradesh-a Congress sorkar a tluk phah tawh a ni.
Congress-in an MLA-te hum tum
Nath-a a nghing ta si a, Congress chuan an chhiat buai lohna turin hma an la nghal mek a, an hruaitute chuan MLA-ten an zui chhuah huk lohna turin hma an la nghal mek a. Inthlanpui a hnaih tawh bawk si avangin an teh huk lohna tur an dap.
Madhya Pradesh Congress chief Patwari, Leader of Opposition Umang Singhar leh hruaitu lawk dangten an MLA-te chu a mal malin an kawm hlawm nia sawi a ni a. An tum bulpui ber chu MLA, MLA hlui leh Congress-a chanvo pawimawh chelh, Nath-a leh a fapa, MP Nakul Nath thuihhruai zinga telte an ni deuh va. MLA an chhuah huk chuan anti-defection law hmanga an nihna paih theih an ni dawn hlawm a ni.
Congress-in an bitum zingah hian minister hlui, Sajjan Singh Verma leh Sukhdev Panse bakah MLA tang lai zingah Satish Singh Sikarwar, Sukhdev Panse, Sanjay Uikey, Nilesh Uikey, Sohan Valmiki, Vijay Chaure, Kamlesh Shah leh Lakhan Ghangoriya te chu a langsar zual an ni.
Minister leh MP lo ni tawh, Sajjan Singh Verma-a chuan Nath-a hian BJP zawm turin thutlukna a la siam lo tih a sawi a; mahse, a lawm lo tih erawh a sawi a. Kum tam tak a lo thawh tawhna zawng zawngte chu a phu ang zahna a dawng let lo niin a sawi a ni.