Aizawl: Supply Minister B Lalchhanzova chuan kum 2020 atanga thuam that a ngaih vanga khar rih mek, Mualkhang Gas Bottling Plant chu Inrinni tlai khan a tlawh a; sorkarin eirawngbawlna gas hnianghnar zawk a awm theihna turin a tih tur ang ang chak takin a ti zel dawn tih a sawi.
Minister chuan Indian Oil Corporation Limited (IOCL) hotute nena an inbiakna atangin tuna Mualkhang Gas Bottling Plant-a hmalakna a awm chhunzawm theih lohna, Provisional Land Lease an lo pek tawh sa chu Regular Land Lease pe tura ruahmanna kalpui mek a ni tih a sawiin; rail fed oil depot hmun tur pawh ram thehluhte atanga zirchianna an neih mek thu leh an tihfel thuai a beisei tawh tih a sawi.
IOCL aiawha minister lo dawngsawngtu, Z Lhungdim, Mualkhang Gas Plant manager lo ni tawh thin chuan, “Bottling plant hi gas dahna bur lian, bullet an tih a pan tawh avanga thuam that a ngaih avangin January, 2020 atang khan khar a ni a, tihlen tura ruahmanna siam niin Rs Vaibelchhe 225 senna tura ruahman a ni a; tuna plant hmunhma hian a zawh dawn loh avangin sorkar hmasa khan ram a lo lei belh tawh a, IOCL hminga Permanent Land Lease a la neih loh avangin hmalakna a kal chak thei lo a ni,” a ti.
Hei bakah hian Tripura atanga natural gas pipe line siam mek chu LPG nen a inan loh avangin mipuiin LPG an mamawhna chu a hniam phah chuangin an ring lo tih a sawi.
Minister chuan eirawngbawl gas hnianghnar zawk a awm theih nan sorkarin a tih tur angte chak takin a ti zel dawn tih a sawi a, bottling plant hmun hmate en kual a ni bawk.
Mualkhang Gas Bottling Plant tihlen tum hi ni tin gas bur 8,500 siam chhuak thei tura ruahman a ni a, hapta hnih daih gas khawl thei tura beisei a nih bakah, sorkarin state pawn atanga gas lakluh nana a senral thin chu kum khatah Rs. Vaibelchhe 5 vel zetin a tlem phah beisei a ni bawk.
Minister hian Khamrang leh Mualkhang tlawhin, khawtlang hruaitute nen inkawm hona hun an hmang a; mipuiin harsatna an tawh mek an lo thlente chu a theih anga chin fel tum a nih thu a sawi.