Aizawl: Sorkar laipuiin passenger phur lirtheia hmeichhia leh naupangte an him zawk nana thupek a chhuah angin Mizorama lirthei mihring phur zingah anmahni chhui theihna tur khawl, tracking device vuah 202 an awm tawh.
Sorkar laipui chuan kum 2019 khan lirthei ke pali leh a chung lam nei, pasenger phur lirtheite chu vehicle location tracking device leh emergency alert button vuah vek turin thupek a tichhuak a, he thuchhuak ang hian Mizoram sorkara transport department pawhin August 22, 2023 khan hriattirna tichhuakin mihring phur lirtheite chu khawl hi vuah turin thupek a tichhuak.
Transport department hnuaia Vehicle Location Tracking & Emergency Alert System (VLT & EAS) Control & Command Centre enkawltuten an sawi danin Mizorama passenger phur lirtheite pawhin location tracking device leh alert button hi an vuah chho mek a, department-in an chhinchhiah chinah taxi 173, bus 17, maxicab pakua leh lirthei dang 13-ten thupek hi zawmin khawl hi an vuah tawh a ni.
VLT & EAS Control & Command Centre enkawltute chuan lirtheia khawl vuahte hi a function tha em tih an endika Mizoramah internet that tawk lohna a la tam avangin duhthusam tak chu ni lo mah se hman tangkai theih chu a ni chho tawh tih an sawi a, hetihlai hian centre hawn tan, September 15, 2023 atanga tun thlengin panic button hmeta tanpuina dil hi an la awm lo a, alert dawn an neihte erawh harsatna a thlen vang ni loa naupang kut hleiin an lo hmeh palhte a nih thu an sawi.
VLT & EAS project-in a tum chu hmeichhia leh naupangte passenger phur lirtheia an him zawk nan leh harsatna tawkten awlsam taka tanpuitu an koh theih nan leh passenger phur lirtheite awmna hmun awlsam taka hriat leh chhui zung zung a nih theih nan te a ni.