Inrinni zana EPL inkhel angah Arsenal chuan an lenluhna Turf Moor-ah tlang an tlir a, Laipui vawi nga lai an hmet puak. Gunners hian an khelh hnuhnung vawi hnihah goal 11 ngawt an thun a, goal chhuah an nei lo. Inrinni zana inkhel dangah Tottenham an tlawm laia an lo chak vangin Aston Villa chuan top 4 huang an luah let leh.
Burnley mual Turf Moor-ah Arsenal in bul an tan tha hle a, inkhel tan atanga minute lina lekah captain Martin Ødegaard chuan hmahruaina goal a thun nghal. Hma taka goal an thun vangin Arsenal tak kawng a awlsam phah a, table hnuai lama goal Burnley chu an goal veng thei bik lovin an siam. Goal thun tuma Burnley in tan an khawh a ngai hi Arsenal tan goal tam zawk an thun theihna kawng sialtu pawimawh a tling.
Hma taka goal an thun hnuin khel tha zui viau mah se Gunners in goal dang an thun belh mai thei bik lo. Chawlhlawk dawn hnaih minute 41-naah season kal meka khel tha tak Bukayo Saka chuan Arsenal goal hnihna a thun a, an hmahruaina a tizau. Saka hian second half tan atanga minute hnihna lekah penalty atangin an goal hnihna a thun zui leh bawk a, Gunners tan goal a thun tluang zel.
Si thum faia hma an hruai hnuin Arsenal an khel tha chhunzawm vawi hnih dang laipui an hmek puak zui leh. Minute 66-naah Leandro Trossard chuan an goal lina a thun a. Minute 78-naah Kai Havertz chuan an goal ngana a thun zui leh bawk a. Mikhual an nihna mualah vawi nga lai laipui an hmet puak a, awlsam takin point thum an hmu. Aesenal hian si nga faia Burnley an hneh hma lawk hian West Ham United chu 6-0 ngawtin an lo sawp tawh bawk. Gunners hian an khelh hnuhnung vawi hnihah goal 11 zet an thun a, goal chhuah an nei lo. An chet that zawn em vang hian hmahruaitu Liverpool leh champion lai Manchester City aiin goal difference-ah an tha zawk ta hial a ni.
Awlsam taka Arsenal an chak laiin Arsenal elpui lian Tottenham Hotspurs erawh chu an mikhual Wolves lakah an tlawm a, top 4 huang atangin nekchhuah an ni ve thung.
Wolves tan hian João Gomes chuan goal hnih a thun a, Spurs tan Dejan Kulusevski chuan goal khat thun ve bawk mah se result a thlak danglam phak lova, an mualah uiawm takin an tlawm.
Tottenham an tlawm lai hian Craven Cottage-a lenglut Aston Villa chuan 2-1 in Fulham an hneh ve thung a, top 4 huang an luah let leh. Villa hian Ollie Watkins goal hnih thun hmangin Fulham hi an hneh a. Khelh 25 atanga point 29 hmuin, an chunga awm Tottenham chu point hnihin an lehpel a, top 4 huang an luah let leh ta a ni.