Badminton hmanga ram hrang hrang team te inelna lian pakhat Badminton Asia Team Championships 2024-ah a vawi khat nan India hmeichhe team an champion. Champion thar India hian an khingpui Thailand chu harsa takin an hneh.
Badminton Asia Team Championships 2024 a chetha tak India hian final-ah Thailand an hmachhawn. Final hmuhnawm takah 2-2 a nih hnuin kum 17 mi Anmol Kharb hnehna hmangin hnehna ropui an chang. Final-ah hian India innghahna PV Sindhu chuan bul a tan tha viau a, a khingpui Supanida Katethong chu 21-12, 21-12 in a sawp.
Sindhu a chak hnu hian India tana inkawp Treesa Jolly leh Gayatri Gopichand te chuan Jongkolphan Kititharakul leh Rawinda Prajongjai te inkawp chu 21-16, 18-21, 21-16 in an hneh ve leh a, 2-0 a hmahruaiin, champion turin an dinhmun a tha viau tawh.
An chak zawn hnuin India hi an tlawm zawn ve leh thung a, dinhmun derthawngah an ding thar ve leh. India mimala inlan Ashmita Chaliha chu Busanan Ongbamrungphan lakah 11-21, 15-21 in a tlawm a. Hemi hnu hian India tana inkawp Priya Konjengbam leh Shruti Mishra te chu Aimsaard unau Beyapa leh Nuntakarn te inkawp lakah an tlawm zui ve lah a, 2-2 niin champion tur zawk tihchian zui ngaiin a awm.
Champion tur tihchianna inkhel pawimawh takah India tana inlan kum 17 mi Anmol Kharb a khel tha viau a. World no 472-naa awm mek Anmol Kharb hian World No. 45 Pornpicha Choeikeewong chu 21-14, 21-9 in a hneh ta mai a, India chu ropuina ramah hruai thlengin an la champion ngai lohna Badminton Asia Team Championship-ah ropui takin a champion pui.
BATC champion thar India hi champion phuin an inlan a, an khel tha tluang hle. An khelh hmasak berah team lian China an hneh nawlh a, Hong Kong an hneh hnuin semi-final-ah Japan an hneh leh nawlh a, Thailand lakah vannei zui lehin trophy lian an chawi zui ta a ni.
Hmeichhe team an champion nawlh lai hian mipa team erawh chuan quarter-final-ah 2-3 in Japan an hneh lova, semi-final an lut zo lo ve thung.