Mizoram Snooker & Billiards Association (MSBA) buatsaih Mizoram 6 Red Snooker Championship Tournament 2024 chu February 17, Inrinni zan khan MSBA Hall, Hawla Indoor Stadium-ah final khelin a hmawr bawk a ni a, Lalsangzela, Khatla South chu a champion nawn leh.
Final hi zan dar 6:00 atangin khelh tan a ni a, Lalsangzela leh T Laltanpuia ten inkhel hmuhnawm an lantir. Final hmuhnawm tak hi Race to 6 a khelh niin, zan dar 8:50-ah zawh fel a ni a, Lalsangzela chu 6 – 2 in a champion ta a ni. Champion thar Lalsangzela hi MSBA buatsaih ‘Mizoram State 6 Red Snooker Ranking 2024’ Jan 27, 2024 Inrinni-a zawh takah khan champion a lo ni tawh bawk.
Mizoram 6 Red Snooker Championship 2024 hi Feb 12 tlai atang khan khelh tan a ni a, Snooker table pali-ah a ruala khelh thin niin, tlai dar 4:30 atanga zan dar 9:00 thleng match a awm thin a. He inelna hi champion tumin mi 31 in an hmachhawn a. Player 31 zingah hian Zaithangpuia, Siaha chu Aizawl khaw pawn player awmchhun a ni a. He inelna hi double elimination hmanga khelh a ni.
Champion thar Lalsangzela hian semi-final-a a khingpui K Lallawmkima chu 5 – 0 in a hneh a, final-a a khingpui T Laltanpuia chuan 5-3 Lalbiaksanga hnehin final a lut ve bawk. Final hmuhnawm takah Sangzela chuan phu takin hnehna a chang zui ta a ni.