Champhai District Legal Services Authority (DLSA)-in nimin khan Champhai District Jail-ah Mental Health Camp a buatsaih a. DLSA Secretary V Vanlalhriata’n lung ina tang mek zingah rilru lama harsatna nei ten dan anga enkawlna an dawn theihna tura Mental Health Camp chu buatsaih a nih thu sawiin, an rilru hriselna endiktute lakah inthlahrung lova an harsatna te thlen turin a chah.
Champhai District Jail Superintendent Lalthuthlungropuia’n DLSA in lung in tang te an ngaipawimawh chu lawmawm a tih thu sawiin, Mental Health Camp chu tangkai taka hmang turin lung in tang te pawh a chah a. Rilru puthmang dik neia, lung in tan nawn leh ngai tawh lo tura an rilru siamthar turin a chah bawk.
Clinical Psychologist Vanlalmuani Pachuau-in Champhai District Jail-a tang mek ten zawhna an chhanna atanga a lan danin lung ina tang mek zinga mi 60 in rilru lamah harsatna an nei niin a sawi a. Rilru a hrisel loh chuan taksa hriselna nasa takin a nghawng a, taksa ral dotu thlengin a tichak lo thei tih sawiin, taksa hriselna tluk zetin rilru hrisel- na ngaihpawimawh a tul thu a sawi. Rilru hrisellohna thlen theitu leh a tihreh dan kawng hrang hrangte a sawi bawk a ni.
Champhai District Jail-a tang zinga rilru lama harsatna neite chu an hriselna endiksak an ni a. Dist Legal Services Authority, Champhai buatsaih vekin ni 21 atanga ni 23 February, 2024 thleng Skill Development Training an nei dawn bawk.