Kum 51 zet bo tawh Paul McCartney-a bass guitar hmu let a, a neitu kuta hlantu hmeichhe pakhat chuan mit var man a beisei hle.
Rimawi khawvela bass guitar pawimawh ber zinga chhiar tel leh Beatles hla hit tak tak siam nana hman ni bawk hi 1972 khan a khuangcher bo hmiah mai a, karhmasa khan an hmulet ve chiah a ni.
Cathy Guest hian a pasal Hadyn boral hnu lawkah bass guitar hi a hmuchhuak a, a pasal unaupa Graham hnen atanga an rochun a ni nghe nghe.
Sir Paul McCartney hnena hlan a nih lai hian guitar case-a lehkhaziak dahin, hmeithai mai a ni a, fate pahnih enkawltu a nihna ah sum an indaih lo hle, tih thlengin a ziak.
“Kan chhungkaw member pakhat boral hnu-ah kan pa in a rochun a. Khawi atanga an neih nge, tih reng a hre lo. Music lama tui tak a ni a, In lamah pawh rimawi a tum fo thin. Paul-a bass pawh hi a bang lo. Music kan tui ve ve a, kartawpah te hian show awmna kan hriat tawh chuan kan hmaih ngai lo,” a ti bawk.
Beatles bassist hlui leh a team te hian mit var man chungchangah engmah an sawi lova, an hnen atang thu thar a la hre lo.
“Rock n’ roll history-a hmun pawimawh changpha, band ropui ber zingami ni bawk a tel pha a ni a, an hnen atanga thu thar nghakin, ka inhawng reng a ni,” tiin Guest hian a sawi.
Tarlan tawh angin, he bass guitar hi Los Bass project kaltlanga hun rei tak an zawn buai hnu ah ‘The Hofner bass’ hi Sussex-a thil hlui dahkhawmnaah an hmuchhuak hlauh mai a ni.
Sir Paul hian he bass guitar hi 1961 khan Germany-ah pound 30 in a lei a, tuna a hlut dan tur leh manto dan tur hi hisap ngaihna pawh a awm lo, an ti hial.
He bass guitar hi an hmuh lai hian a la pangngai angreng viau a, play thei tur erawh chuan siamthat ngai neuh neuh chu a awm mai thei.
Kum 51 hnu-a a ngainat leh kuat chawt thin bass guitar ngei mai a hmu leh thei chu a lawm hle niin, a thupuangtu chuan a sawi.