Aizawl: South Tuipui bialtu MLA, Jeje Lalpekhlua’n a bial chhung, Cherhlun khawtlangin fur zikhlum an chinna hmuna, Zo Zikhlum hmun panna kawng laihna atan Rs. 2,00,000 a pek hmangin, nimin atang khan khawl lian hmangin lirthei lian zawk tlan theih turin kawng an lai tan.
Cherhlun Zo Zikhlum hmun panna kawng hi kawngpui atanga km 1 vel niin lirthei te, pick-up chauh a kal theia ni.
Zo Zikhlum chinna hmunah kum kalta khan chhungkaw 36 velin zikhlum hmun siamin eizawnna atan an hmang a, zikhlum pawh quintal 900 vel lai an thar chhuak a. Kumin hian chhungkaw 60 aia tam mahin zikhlum hmun neih tumin hma an la mek.
Nikum MLA inthlan dawn khan helai hmun hi Jeje Lalpekhlua hian a lo tlawh tawh a ni.
Cherhlun Zo Zikhlum chingtu pawl te chuan bialtu MLA, Jeje Lalpekhlua’n an harsatnate hriaa an zikhlum chinna kawng lirthei lian tlan theih tura khawl lian hmanga hun reilo chhunga a laih sak nghal chu lawmawm an tih thu an sawi.