Aizawl: Thawhlehni khan Congress party hruaitu an inthlang a, President atan Lal Thanzara thlangin, Vice president-ah Lalnunmawia Chuaungo leh treasurer atan Dr. Lalmalsawma Nghaka an thlang.
Congress Bhavan-ah inthlanna neih a ni. Vote hi chawhma dar 10 atanga chawhnu dar 4 thleng an thlak.
MPCC elected OB tur pathum – President, Vice President leh Treasurer thlan tur a ni a. President-ah Lal Thanzara leh Zodintluanga Ralte te’n an chuh a, Vice President-ah Lalnunmawia Chuaungo leh Ngunlianchunga te an inkhing a, Treasurer-ah Dr Lalmalsawma Nghaka leh Lalrindika Ralte an inkhing thung.
Executive member hi mi 60, mipa 50 leh hmeichhia 10 thlan chhuah tur a ni a. Hetah hian mipa 84 leh hmeichhia 16 in hming an pe a ni.
Thudawn danin, MPCC office bearers thlang theitute chu Unit President zawng zawng, Block elected office bearers zawng zawng, DCC office bearers (constitution-a mi ang) leh executive member zawng zawng, State level Frontal Organisation-a OB zawng zawng (an constitution a mi ang), MPCC executive member zawng zawng, Congress Village Council President/Congress Local Council Chairman zawng zawng, State Level chief Organiser, Dy Chief Organiser leh Organiser te an ni.
MPCC executive member thlang theitute chu Block elected OB zawng zawng, DCC OB zawng zawng, State Level Frontal Organisation OB zawng zawng, Congress MDC zawng zawng, MPCC executive member zawng zawng, State Chief Organiser, Dy Chief Organiser leh Organiser te, District Level Frontal President te, MPCC Cells/Departments/Sub-Committee Chairman/Secretary te an ni.