India-a police-te chuan sorkar nen vawi li zet an inbiakna a la hlawhchham zel hnua an an lungawi lohna lantir nana Delhi pana kal lo neitute chu lo hnawh darh nan mittui tlakna hmangin an phuh leh.
An thar chhuahte hralhna tur man tlawm ber bithiahsak phuttu lo neitute hian lungawi lohna an lantir hi thla tam tak pawh kalpui thei turin an inring lawk tih an sawi.
Delhi ramri-ah an luh lohna turin dalna tur thuah tam tak siam niin barbed wire pawh zam a ni.
Lo neitute erawh chuan heng an dalna paltlang tur hian a tul a nih chuan khawl lian pawh an hman mai tur thu an sawi ve thung.
Shambhu ramri, Punjab leh Haryana state inrinaa thil thleng video darhah chuan lo neitu sang tel hi kal zel turin an inbuatsaih a, bulldozer leh earthmover te pawh an inring tel bawk tih a lang.
Police-ten ramri pana an kal hi dan nan mittui tlaknain an lo phut niin BBC Punjabi chuan a tar lang a. Lo neitute hi kar hmasaah khan hetianga lo dan an nih tawh avang hian tun tumah hian an inring hle a, hmai tuamna, kutkawr leh safety suit nen an inthuam.
An zinga tam tak chuan lehkhachaih thlawhtirin police-in drone hmanga mittui tlakna an phuh chhuah tur chu tihbuai an tum bawk.
Lo neitu hruaituten thuchhuah an siamah inpumkhata venhim hnathawktute pawh bei let lo turin an hote chu an hrilh.
Agriculture Minister Arjun Munde chuan a vawi nga nana inbe leh turin lo neitute hi a sawm a. “Kan zavaia tan muanawm taka thil tih hi a pawimawh a ni,” tiin X-ah a tar lang a. Lo neituten an la chhang lo.
Khawpui ber atanga km 200 vela hlaa inkulh mek lo neitute hi kar hmasa atang khan Shambhu ramri-ah hian an awm tawh a. Thuneitute chuan hnawh darh nan mittui tlakna bakah thelret silaimuin an kap tawh a. Minister-ten inbiakpuia an sawm hnuah kal zel lovin an ding rih a ni.
Thuneitute hian kum 2020-a thil thleng, lo neitu sang telte Delhi ramria khaw awm dan uchuak tak leh Covid pawh hlau zo lova lo neih dan kaihhnawih dan siam hlih leh an phuta thla tam tak an inkulh ang kha a thlen leh an hlau va. Kum khat vel zet inhawr khawmnaah hian mi tam tak an thi a, sorkar pawhin dan a siam tharte hi a hnuk kir leh hial a ni.
Tun tuma lungawi lohna an lantir hi inthlanpui a hnaih mek lai a ni a. Prime Minister Narendra Modi-a kaihhruai BJP-in a zawna a vawi thum nana sorkar an tum leh lai a ni a. Lo neitute hi India-ah chuan vote hlawm tak niin mi thiamte pawhin sorkar hian a tihthinrim loh leh an thil phut a ngaihsamsak a remchang rih tawh lo niin an ngai.
Lo neitute hian an kawng zawh mek chu muanawm tak a nih thu leh sorkar chu khawpuia an luh phalsak mai turin an ti ve mek.
“Keimahni lam atang chuan a tha thei ang ber kan tum a. Inbiaknaah pawh tha taka telin kan harsatna sutkian dan tur pawh kan ngaithla a, tunah chuan sorkarin thutlukna a siam ve a ngai tawh thung a. Buaina siam kan tum lo va, heng min dalnate hi la kiangin Delhi min pantir mai rawh se,” tiin lo neitute hruaitu, Sarwan Singh Pandher chuan thuthar lakhawmtute hnenah a sawi.
Sorkar hian lo neitute hi vawi li zet a kawm tawh a. Kum 2020-21-a lungawi lohna an lantir tuma sorkarin a tiamte tihhlawhtlin a la ni lo niin lo neitute hian an sawi a, pension siamsak leh an leiba ngaihdamsak an phut bawk.
Thawhtanniah khan lo neitu hruaitute hian sorkarin kum nga chhung atan thlai thenkhat leina tur man bithliah a tum chu an hnawl a, sorkar thil tiam chu ‘an duhkhawp a ni lo’ tih a sawi.
Sorkar hian be lam chi, vaimim leh cotton te chu leihsak theihna man hniam ber, Minimum Support Price (MSP) siamsak a tum a ni.
Lo neitute erawh chuan MSP hi thlai chi hrang hrang 23-ah siam vek an phut ve thung a ni.
Hetih lai hian Haryana-a police-te chuan Punjab-a an thawhpuite chu an himna turin ramri atanga km khat aia hnaiah hmeichhia, naupang leh chanchinbu mite chu awmtir lo turin an ngen a. Lungawi lohna hmuna bulldozer leh khawl lian awmte chu lo mansak turin an ti bawk.
Delhi-ah pawh venhimna khauh taka kalpui niin thla khat zet chu mi punkhawm khap a ni tawh bawk.