Aizawl : Mizoram Youth Commission (MYC) Chairman Malsawmzuala Ralte leh OSD to CM Jonathan Lalremruata ten sawrkar laipuia Minister of State for Skill Development Rajeev Chandrasekhar chu a chenna in, Delhi-ah kawmin, MYC-in Mizo thalaite tana skill development training a buatsaih theihna tura hmalakpui turin an ngen.
Rajeev Chandrasekhar chuan MYC Chairman leh OSD to CM chu hnenah hian thalai a tam thei ang ber skill training pek a duh tih a lo hrilh a. MYC atangin lehkha siama, a hnena thehlut turin a lo rawn. Lehkha a hmuh atanga darkar 48 chhungin a team ten Aizawl an thlen nghal tur thu sawiin, anni nena sawiho hnuah final mai tur a nih thu a lo hrilh bawk.
MYC Chairman leh OSD to CM chu Taipei Economic and Cultural Centre-ah pawh lengin, Assistant Representative, Director, Education Division Peter L.Y. Chen an kawm a, Taiwan-a Mizo thalaite tana hnathawh theih dan awm ang te sawihovin, a remchan dan anga hmalakho ni se, an ti niin sawrkar thuchhuah chuan a tarlang bawk a ni.