Pakistan-a inthlan boruak chiri tak avangin India chuan a thenawm ram hi sumdawnna lamah ‘Most Favoured Nation’ status atangin a paih thla a, hei hian India-Pakistan ramri, Attari-ah chuan sumdawnna a nghawng nasa hle.
Sumdawngte chuan Pakistan lam atanga thil leitute leh siam chhuaktun Pakistan atanga an thil chah lawk zawng zawng an cancel vek a, an pawisa pek lawk tawhte pawh an dil leh mek tih an sawi.
“February 14 atang khan Pakistan nena sumdawnna hi a tawp a. Sorkarin Pakistan ram atanga thil lak luha chhiah 200% zeta a tihpun hnuah tunah hian truck 200-250 vel chu a ruakin ramri bulah an ding,” tiin Amritsar-a sumdawng, Sukhbir Singh chuan a sawi.
“Sorkarin Regulatory Duty a tisang vak mai hian sumdawngte tan thla tin installment-a tire leh truck kan hman man a nghawng a. Sorkar hian ngaihtuah tha leh sela kan duh a, ramria ei leh bar thlengin a nghawng a ni,” tiin sumdawng dang, Sharan Singh chuan a sawi bawk.
‘Most Favoured Nation’ status hi India hian kum 1996 khan Pakistan hnenah a pe a. He status hi ram leh ram indawrnaa inenhranna awm lova World Trade Organisation hnuaia awlsam taka insumdwn tawnna a ni.
Hetianga ‘Most Favoured Nation’ nei ramte chu man tlawm zawk te, awlsam zawk leh sumdawnna lama inremna tha zawk neihna niin General Agreement on Tariffs & Trade (GATT)-a clause hmasa berah dah a ni.
Sumdawng dang, Rajdeep Upel chuan Pakistan nen insumdawn tawnna hi Punjab-ah emaw chauh tihtawp theih a ni lo va, Jammu & Kashmir-ah pawh a ngai tih a sawi a, “Sumdawng pawlte chuan sorkar thutlukna hi tha kan ti a; mahse, Kashmir lamah kawng a inhawng reng tho si a, he khapna hi an hmang ve lo,” tiin kai rual zawka hman theih ni se a duh tih a sawi.
Tar lan tawh thin angin February 14 khan CRPF sipai 40 zet chu Jammu-Srinagar highway-ah Pakistani firfiakten thihchilh bomb hmanga thatin India leh Pakistan inkar a khi zual hle a ni.