Lok Sabha inthlanpui neih tura a campaign-naah Delhi chief minister leh Aam Aadmi Party (AAP) chief ni bawk, Arvind Kejriwal chuan Delhi-a bial 7 awma an party-in hnehna an chan vek chuan kum hnih lo awm tur chhungin state puitlinga hlan kai an nih tur thu a sawi.
Kejriwal hian an party-in ram khawpui ber huam chhunga hnehna an chang a nih phawt chuan chhungkaw tin hnenah chenna tur in an neih vek tur thu a sawi bawk.
Kejriwal hian nimin khan hmun hniha vantlang inkhawma thu a sawinaah Congress chuan AAP-in Delhi-a BJP paihthlak tuma thawhhona tura an dawrna an pawm lo tih a sawi a. “India ram pumah, BJP duh lotute vote hi a inthen tur a ni lo va. Delhi-ah pawh BJP bei tur candidate pakhat awm se, chutiang tur chuan Congress kan dawr a; mahse, Congress hian thu thain min chhang lo” tiin Delhi khawchhak lam, Gandhi Nagar-a thu a sawinaah a sawi a. Congress hian Delhi-ah chauh ni lo, Uttar Pradesh leh West Bengal-ah te pawh regional party-te tihtet zel a tum niin a sawi a ni.