German champion Bayern Munich leh an manager ni mek Thomas Tuchel chu season tawp rualin an inthen dawn a. Bayern Munich hian season tharah manager thar an neih ngei a ngai dawn. Tuchel hmunruak luah a, Bayern Munich manager thar ni thei dinhmuna ding langsar zualte kan tarlang ang.
- Xabi Alonso
German Bundesliga-ah Bayern Leverkusen hmahruai pui mektu Xabi Alonson hi Bayern Munich in an manager thar ni tura an duh ber a ni mek. Alonson hian Bayer Leverkusen hi a chetthatpui viau a, German club zingah tlawm nei lova kal tluang rei Bayern Munich record a an tluk hial tawh a. Record thar siam thei dinhmunah an ding mek. Leverkusen a chetthatpui em vangin Alonso hian duhtu a nei hrawl hle. Liverpool chuan Jurgen Klopp hmunruak luahtu atan an midfielder hlui Alonso hi an duh hle. Liverpool bakah hian Real Madrid pawhin an hmutai ve bawk.
An khelh hnuhnung vawi thumah an tlawm zawn vangin Bayern Munich a Tuchel dinhmun a derthawng a, a bang dawn tih a chian hma hauhin Bayern hian an manager thar ni turin Xabi Alonso hi an ngaihven nghal. Bayer Leverkusen in chelh tumin thapui an thawh a, club lian dangten an lo hmu tai bawk nen Bayern Munich tan rawih a har tur a ngaih a ni.
- Zinedine Zidane
France leh Real Madrid midfielder roui ni thin Zinedine Zidane hian May 2021 khan Real Madrid in an ban a, hemi hnu hian club enkawl a la nei leh lo. France pawhin an ram team enkawl turin an sawm naa a chhang lo. Bayern Munich hian Thomas Tuchel hmunruak luah tura an duh zual zingah a tel a. Juventus, Paris Saint-Germain leh United State pawhin Zizou hi an manager thar ni turin an duh a. Bayern Munich manager thar a ni ta a nih pawhin an inhmeh viau tura ngaih a ni.
- Hansi Flick
Bayern Munich hian an manager hlui Hansi Flick chu an manager thar ni turin an duh leh der tawh. Flick hian kum 2019-2021 chhung khan Bayern Munich hi a lo enkawl tawh a, a chet thatpui thawkhat. Germany a enkawl zuai a, a chetthatpui loh vangin a hna chan har lo. Club enkawl nei lova awm mek a nih vangin Bayern Munich tan hian rawih nawn leh a har lo tura ngaih a ni.
- Jurgen Klopp
Season tawp ruala Liverpool chhuahsan tur Jurgen Klopp hi Bayern Munich chuan an manager thar ni turin an duh hle. Klopp hian Borussia Dortmund a lo enkawl tawh vangin Bundesliga-a a tih theih hrethiangtu chu Bayern hi an ni. German club ropui Bayern in an manager thar ni turin duh viau mah se amah ber hian Bayern Munich hi enkawl a tum lem loh thung.
- Jose Mourinho
Manager lar, manager lulhlul, hlawhtlinna chang thei zet si Jose Mourinho hi AS Roma in an ban a, Saudi Pro-League club leh Italian Serie A club thenkhatte nen sawizawm ni bawk mah se tun thlengin hna thar a la nei lo. Club hlun, player hrawl tak tak kawl khawm mek Bayern Munich hian manager hming langsar an mamawh a. Jose Mourinho hi Byern Munich pawhin an manager thar atan an awt hle.
- Ole Gunnar Solskjaer
Manchester United manager hluii Ole Gunnar Solskjaer hi Bayern Munich manager thar ni thei tura sawi zingah a tel ve teh tlat a. Hei hian mak tih a hlawh ve det. United in an ban hnuain Solskjaer hian hna a la nei leh lo. Bayern Munich hian season tawp hmaa an manager Thomas Tuchel an ban a nih chuan United manager hlui hi an manager lailawk ni turin a duh a. An manager nghet ni tur em chuan an iai ve deuh ni chuan a hriat theih thung.
- Antonio Conte
Italian manager Antonio Conte leh Thomas Tuchel te hian English Premier League-ah boruak an lo nei hat tawh a. An inchibai danin sawi zui a hlawh hle. EPL lama inhal an nih vangin an pahnih hming sawi hi chuan kar a awm sa deuh hial tawh. Conte hian Tuchel thlaka Bavaria a enkawl a nih chuan Tuchel aia record neih that ngei ngei a tum dawn a. Chu chu Bayern hian an hlawkpui thei viau dawn.
Thil chiang ala awm thei lova, tun hi thil inrinsiak hun lai a ni. Goal.com in Bayern Munich manager thar ni thei dinhmuna dingte an tarlan zinga mi hi Bavaria manager thar an ni thei a. Heta hming lang hauh lo pawh hi Bayern Munich manager thar an ni daih thei bawk. Tu nge Bayern Munich manager thar ni ang tih chu hunin a la hril ang chu.