February 21, Nilai zan khan Mizoram Super League (MSL) 9 khelh chhunzawm a ni a, a zawna a vawi nga nan Zarkawt BCA an chak. Nilai zana inkhel dangah champion lai Khatla TBL chuan an khingpui Chanmari Vikings an hneh ve bawk.
MSL 9 a khel tha tluang tak, an khingpuite la hneh vek Zarkawt BCA hian nilai zan khan MSL team thar Champhai Basketball Club an hmachhawn a, point 14 zetin hnehna an chang. BCA hian Champhai lakah bul an tan tha a, quarter khatnaah point 12 zetin an chungnung nghal. Bul tan tha viau mah se quarter hnihnaah Champhai BC er let an dawl lova, point ngain hnufual zawkah an tang ve thung. Quarter hnihnaah khel tha lo mah se BCA hian point 9 a hmahruai chungin chawlhlawk an hmang tho thung.
Chawlhlawk hnu lamah BCA an khel tha leh zual a, an hawi kir tawh lo. Quarter thumnaah point hnihin an chungnung thei hram a, quarter hnuhnung berah point ngain an chungnung zui leh bawk a, Point 101-95 in hnehna an chang a. Season tharah vawi nga chak zawn tawhin BCA hneh thei an la awm lo. Vawi nga chak zawn tawh BCA hian table-ah hma an hruai chhunzawm zel.
Zarkawt BCA tan hian Emmanuel Malou a khel tha a, point 38 lai a thawkchhuak. Mizo player zinga chetha thei tak Lalnunpuia Renthlei chuan point 30 a thawkchhuak a, a chetha leh pek hle. Champhai BC tana point thawkchhuak hnem ber Tevis Ryan Robinson Jr. chuan point 37 a thawkchhuak ve bawk.
Nilai zana inkhel hnuhnung zawkah champion lai Khatla TBL chuan an khingpui Chanmari Viking chu 81-71 in an hneh. TBL tan hian Joshua Aaron Keys chuan point 33 a thawkchhuak a. Viking tana point thawkchhuak hnem ber Tamas Amonte Bruce chuan point 30 a thawkchhuak a, mimal takin a chetha hle a ni.