Aizawl: MNF chuan Minister Lalthansanga chu Assembly House chhungah thubelhchian dawl lo sawiah a puh.
Nimina an thuchhuahah MNF chuan budget session mekah, February 21, 2024 khan Food, Civil Supplies & Consumer Affairs dept. hnuaia retailer chungchangah minister Lalthansanga’n Zarkawt venga retailer hnathawk mektu, kum 2018-a MNF kaihhruai sorkar lo ding tharin ban nghal leh, kum 2018 tawpah a thar an ruat nghal anga sawi a, MNF kaihhruai sorkar kalta chu dan bawhchhiain, duhsak zawngte duhsaka rorel anga a sawi chu, “Thu dik lo, Mizoram rorelna in sang ber chhunga a sawi mai hi MNF chuan pawi a tiin, thu dik lo hmanga mipui kaihhruai tumnaah a ngai a. Thu dik puang chhuak turin kan ngen,” tiin, house-ah thubelhchian dawl lo sawi tawh lo turin an ngen tih an tar lang.
MNF chuan retailer hi term nei an nih thu leh, a nilaiten dan an bawhchhiat a, dan anga an chungthu rel a nih loh chuan tumah a hun hmain duhsak zawng pawh dah theih a nih loh thu an tar lang a. Memo. No. B. 12012/6/2017-DCSO(E)/:Dated Aizawl, the 20/8/2019 angin Zarkawt FP Shop Retailer tur hian K. Zoramena, Zarkawt chu dan ang thlapin a hmaa lo chelhtu term tawpah chauh ruat a nih thu tar langin, “Pu Lalthansanga, Minister hian Assembly House-ah meuh thudik lo a tlangau pui mai hi a pawi takzet a ni,” an ti.