Aizawl : February 8, 2024-a Special Court (ND&PS Act, 1985), Aizawl in methamphetamine vanga man mi palite chu thiam loh a chantir chu nimin khan hrem an nihna a puang.
October 28, 2022 khan Excise & Narcotics Department chuan methamphetamine tablet 10,000 (kg 1 & gram 4) leh he thubuaia inhnamhnawih nia puh mi pali – Zodingliana aka Zadingluaia (40), Chaltlang Venglai, Aizawl; Samil Ahmed (28), Kalalchouri, Karimganj District, Assam; Vanlalruati (41), Hlimen, Kolasib District leh Zorampari (46), Bilkhawthlir Kawn Vengte chu an man.
An pali hian The Narcotic Drugs & Psychotropic Substances Act, 1985 tlawhchhanin thubuai siamsak an ni.
He thubuai hi Judge, Special Court (ND&PS Act, 1985), Aizawl chuan ngaihtuahin thuhretu koin, finfiahna hrang hrangte a endik hnuah February 9,2024 khan The Narcotic Drugs & Psychotropic Substances Act, 1985 tlawhchhanin thiam loh chantirin, nimin khan thiam loh changte hremna hi a puang.
Zodingliana aka Zadingluaia chu heng ruihhlo hralh tur zuartu ber niin Section 22 © of NDPS ACT hmangin kum 10 chhung hrehawm taka lung in tang tur leh Rs nuai khat chawi tura hrem a ni a, heng pawisa chawi tur hi a neih loh chuan thla 4 dang a tan belh
ang.
He thubuaia thiamloh chantir midang pathum Samil Ahmed, Vanlalruati leh Zorampari te pawh Section 22 © of NDPS ACT hmangin kum 10 chhung hrehawm taka lung in tang theuh tur leh Rs nuai khat theuh chawi tura hrem an ni a, heng pawisa chawi tur hi an neih loh chuan thla hnih dang an tan belh ang. Amaherawhchu Court-in an chungah zahngaihna lantirin heng hremna chi hnihte hi hun thuhmuna kaltir (concurrently) dawn thung.