Aizawl: Fisheries Minister Lalthansanga’n politics-a induhsakna tel loin a ti tak tak tur leh dil neite hnenah sangha chi sem a ni tawh dawn tih house a hrilh.
Nimin assembly session-a zawhna leh channa hunah fisheries minister chuan tun hma in sangha chi supply-naah hleih neihna te a lo nasa viau tawh thin nia a lan thu leh hei hian sangha thar tamna tur chu a lo pawt hnial hle thin nia a lan thu a sawi a; chuvangin, tun hnuah chuan district level committee ah pawh sangha chi pek tur thlan dan pawh an uluk tawh dawn a, politics tello in sangha chi pek tur pawh an thlan tawh tur thute, chutianga an kal chuan sangha thar chhuah pawh nasa takin a sang turah an ring tih a sawi.
Mizoram chu sangha thar tha ve hle tawh tura ngaih a nih laiin, chhan hrang hrang avangin a la thar chhuak tam lo a, chungah chuan sangha chi tha duh ang hmuhtawk lohna chu a chhan zingah a tel thu a sawi a, tunah hian sangha chi tha thar chhuak turin nasa taka hma an lak tur thu a sawi bawk.
Minister Lalthansanga chuan kum 2019 atanga 2023 chhungin mi 3,902 hnenah sangha dil tanpuina pek an nih thu a sawi a, kum 2019-2020-ah mi 188, 2020-2021-ah 1759, 2021-2022-ah mi 1449 leh 2022-2023-ah mi 506 te hnenah sangha dil tanpuina pek a nih thu zawhna chhangin a sawi bawk a ni.
Fisheries minister hian zawhna a channaa a tarlan danin, kum 2018 atanga 2023 chhung khan Mizoramin sangha a thar chhuah chu quintal 2,79,764.50 a ni a, 2018-2019-ah quintal 70,241.30, 2019-2020-ah quintal 7,0431, 2020-2021-ah quintal 43,043.10 , 2021-2022-ah quintal 45,750.50 leh 2022-2023-ah quintal 50,298.60 sangha thar chhuah a ni.